દક્ષિણ કાશ્મીરના બિજબેહરાના વાઘામા ગામમાં સુરક્ષાદળો અને આતંકીઓ વચ્ચે અથડામણ જોવા મળી છે. આ અથડામણમાં 2 આતંકીઓને ઠાર મરાયાં છે. કાશ્મીર ઝોનની પોલીસે ટ્વિટ કરી અનંતનાગના વાઘા વિસ્તારમાં અથડામણ અંગેની જાણકારી આપી. જમ્મૂ-કાશ્મીર અને સેના દ્વારા હાલ સર્ચ ઓપરેશન કરવામાં આવી રહ્યું છે.
જમ્મૂ-કાશ્મીરના પોલીસ અધિકારીએ કહ્યું છે કે પોલીસ, 3RR સેના અને CRPF ની એક સંયુક્ત ટીમે આ વિસ્તારમાં આતંકીઓની ઉપસ્થિતિ અંગે ઇનપુટ મળતાં સર્ચ ઓપરેશન હાથ ધરવામાં આવ્યું છે. આ સાથે સેનાની સંયુક્ત ટીમે શંકાસ્પદ જગ્યાને ઘેરી લઇને છુપાયેલા આતંકીઓ પર સર્ચ ઓપરેશન સાથે ફાયરિંગ કર્યું હતું. જેને લઇને આતંકીઓ સાથે અથડામણ થઇ હતી.
જૂનના મહીનામાં દક્ષિણ કાશ્મીરમાં આ 14મી અથડામણ થઇ છે. અત્યાર સુધીમાં 38 આતંકવાદીઓ ઠાર મરાયાં છે. કાશ્મીરમાં આતંકવાદ શરુ થયા બાદ એક મહીનામાં સૌથી વધારે આતંકવાદીઓ ઠાર આ વર્ષના જૂન મહિનામાં કરાયાં છે. આ વર્ષે ઠાર મરાયેલા આતંકવાદીઓની કુલ સંખ્યા અત્યાર સુધીમાં 118 થઇ છે.