નવું ટેન્શન / ખતરો ટળી ગયો એવું સમજવાની ભૂલ ન કરતાં, કોરોનાનાં નવા વેરિયન્ટની ભારતમાં થઈ ગઈ એન્ટ્રી, અહીં નોંધાયા કેસ

• ભારતમાં નવા કોરોના વેરિએન્ટની એન્ટ્રી
• તમિલનાડુ અને તેલંગણામાં નોંધાયો એક -એક કેસ
•  આ પ્રકારના વેરિએન્ટ જીવલેણ સાબિત થયા નથી 

ભારતમાં ભલે કોરોનાની રફતાર ધીમી હોય પરંતુ દિવસ જાય તેમ નવા વેરિએન્ટ સામે આવી રહ્યા છે. એક તરફ ઓમીક્રોનનો ખતરો તો બીજી તરફ મંકી પોક્સે પણ ચિંતામાં વધારો કર્યો છે. તેવામાં ફરી એકવાર ઓમીક્રોનના સબવેરિએન્ટનો ખતરો સામે આવ્યો છે. નવો સબ વેરિએન્ટ BA.4 અને B.A5ની પુષ્ટિ થઇ છે.  જેમાં એક  કેસ તમિલનાડુ અને જ્યારે બીજો કેસ તેલંગણામાં સામે આવ્યો છે. 

તમિલનાડુની મહિલામાં BA.4 સબ-વેરિયન્ટ જોવા મળ્યો

ઇન્ડિયન SARS-CoV-2 સિક્વન્સિંગ એસોસિએશન (INSACOG) એ રવિવારે એક નિવેદનમાં જણાવ્યું હતું કે તમિલનાડુની એક મહિલા વાયરસ સબ-વેરિઅન્ટ BA.4 થી સંક્રમિત મળી આવી છે. નિવેદન અનુસાર, મહિલામાં હળવા લક્ષણો છે અને તેણે કોરોના રસીના બંને ડોઝ લીધા છે. મહિલાએ ક્યાંય પ્રવાસ પણ કર્યો નથી.

તેલંગાણાનો માણસ BA.5 થી સંક્રમિત

તો આ તરફ તેલંગાણામાં એક 80 વર્ષીય માણસને સબવેરિએન્ટ B.A5ની પુષ્ટિ થઇ છે. આ વ્યક્તિએ પણ કોરોનાની રસીના બંને ડોઝ લીધેલા છે તેણે પણ ક્યાંય પ્રવાસ કર્યો નથી. 

સૌ પ્રથમ દક્ષિણ આફ્રિકામાં નોંધાયો હતો કેસ

નોંધનીય છે કે, આ વર્ષની શરૂઆતમાં દક્ષિણ આફ્રિકામાં આ પ્રકારના કેસ પ્રથમવાર નોંધાયા હતા. પરંતુ હવે અન્ય ઘણા દેશોમાંથી આની જાણ થઈ રહી છે. ઓમિક્રોનના બે સબવેરિએન્ટ BA.4 અને BA.5 વૈશ્વિક સ્તરે ફેલાઈ રહ્યા છે. આ બંને સબ વેરિએન્ટના કેસો આ વર્ષની શરૂઆતમાં દક્ષિણ આફ્રિકામાં નોંધાયા હતા અને હવે અન્ય ઘણા દેશોમાં પણ તેની પુષ્ટિ થઈ રહી છે.

દેશના અન્ય શહેરોમાં બી.એ.4 ના રેન્ડમ કેસ મળી આવ્યા

આ પહેલા ઈન્સાકોગ સાથે સંકળાયેલા વૈજ્ઞાનિકોએ જણાવ્યું હતું કે, ભારતમાંથી બીએ.4 સબ વેરિઅન્ટ (ઓમિક્રોન સબ વેરિઅન્ટ બીએ.4)ની વિગતો 9 મેના રોજ જીઆઇએસએઆઈડી પર નોંધવામાં આવી હતી. આ વાતની પુષ્ટિ કરતાં ઇન્ડિયન કાઉન્સિલ ઓફ મેડિકલ રિસર્ચના એક વૈજ્ઞાનિકે એમ પણ કહ્યું હતું કે છેલ્લા કેટલાક દિવસોમાં દેશના અન્ય શહેરોમાં બીએ.4ના રેન્ડમ કેસ મળી આવ્યા છે. જણાવી દઈએ કે સાર્સ-કોવ-2 વાયરસનો આ સ્ટ્રેન દક્ષિણ આફ્રિકામાં કોરોના વાયરસના નવા સંક્રમણની મોટી લહેર માટે જવાબદાર છે. તે જ સમયે, ચેપ અને રસીકરણ રોગપ્રતિકારક શક્તિ સિસ્ટમને અસર કરવા માટે સક્ષમ છે.

બધા પ્રકારો જીવલેણ સાબિત થયા નથી

 વર્લ્ડ હેલ્થ ઓર્ગેનાઇઝેશન (ડબ્લ્યુએચઓ) અનુસાર, વિશ્વભરમાં કોવિડના વધતા જતા કેસો માટે ઓમિક્રોન સબ વેરિઅન્ટ બીએ .4 અને બીએ .5 જવાબદાર છે અને આ તમામ પ્રકારો એક ડઝનથી વધુ દેશોમાં મળી આવ્યા છે. એક મીડિયા રિપોર્ટ અનુસાર, કોવિડ -19 પર ડબ્લ્યુએચઓની તકનીકી લીડ મારિયા વાન કેરખોવે જણાવ્યું હતું કે ઓછામાં ઓછા સોળ દેશોમાં બીએ.4 ના 700 થી વધુ કેસ નોંધાયા છે, જ્યારે 17 દેશોમાં બીએ.5 ના 300 થી વધુ કેસ મળી આવ્યા છે. ભારતમાં કોરોના વાયરસના કેસોના આ તમામ પ્રકારો ખૂબ જ ચેપી છે, પરંતુ તે એટલા જીવલેણ સાબિત થયા નથી.