અમદાવાદ / ખાખીની ભવાઈ! ગુમ થયેલા 2 કોન્સ્ટેબલોની શોધખોળના બદલે બન્ને વિરૂદ્ધ ફરિયાદ નોંધાઈ

બે કોન્સ્ટેબલોએ PI દેસાઈ વિરૂદ્ધ કરી હતી અરજી

મૂળ વાત એવી છે કે, અમદાવાદના નવરંગપુરા પોલીસ સ્ટેશનના બે કોન્સ્ટેબલોએ તેના PI દેસાઈ વિરુદ્ધ 10 તારીખએ એક અરજી આપી હતી. અરજીમાં બન્નેએ આક્ષેપ કર્યો હતો કે, PI દેસાઈ હપ્તાખોર છે અને તેઓ હપ્તા ઉઘરાવવા માટે વહીવટદાર રાખે છે. જોકે, આ બન્નેની અરજીના બાદ 13 તારીખે એક શખ્સ દ્વારા આ બન્ને વિરુદ્ધ અરજી કરવામાં આવે છે અને બન્નેએ લાંચ લીધી હોવાનો આક્ષેપ કરવામાં આવે છે. જોકે, કોન્સ્ટેબલના પરિજનોનું કહેવુ છે કે, કોન્સ્ટેબલે ઉચ્ચ અધિકારીઓનો ભાંડો ફોડ્યો એટલે તેની સામે અરજી કરવામાં આવી છે. 

પરિવારની PI દેસાઈએ મળવાની ના પાડી

કોન્સ્ટેબલ બે દિવસથી ગુમ હોવા છતા તેમનો પત્તો ન મળતા બન્ને કોન્સ્ટેબલના પરિવારજનો નવરંગપુરા પોલીસ સ્ટેશન પહોંચ્યા હતા. તેમણે પોલીસ ઈન્સ્પેકટર પી. બી. દેસાઈને મળવાની રજૂઆત કરી હતી. પરંતુ પીઆઈ મળવાની ના પાડતા તેમણે પોલીસ ઉચ્ચ અધિકારીઓ પર આક્ષેપો કરીને પોતાનો રોષ વ્યકત કર્યો હતો.

PI દેસાઈ પર આક્ષેપ

એક તરફ પોલીસ અધિકારીઓ છે અને બીજી તરફ લાપતા પોલીસ કોન્સ્ટેબલનના પરિજનો. પણ પોલીસ અને પોલીસ પરિજનો વચ્ચેના આ જંગમાં ખાખીની ખુમારી પર સવાલ ઉઠી રહ્યા છે. પોલીસમાં કેવા કેવા વહીવટો ચાલે છે તે સામે આવી રહ્યું છે. પોલીસ કોન્સ્ટેબલના પરિજનો જ પોલીસ તંત્રના અધિકારીઓ પર આક્ષેપ કરી રહ્યા છે.

કોણ તોડબાજ ? કોણ હપ્તાખોર ?

પોલીસ ભલે બન્ને કોન્સ્ટેબલ મળ્યા બાદ કાર્યવાહી કરવાની ખાતરી આપી રહી હોય પરંતુ તેમની અરજી અંગે કેમ જાત તપાસ નથી કરતી? કેમ PI દેસાઈ સામે તપાસ નથી કરતી? તે પણ એક સવાલ છે. તો બીજી તરફ કોન્સટેબલ સાચા હોય તે તેમણે ઘર છોડીને ભાગવું ના જોઈએ. દેશના ન્યાયતંત્ર પર વિશ્વાસ કરીને કાયદાકીય લડાઈ લડવી જોઈએ અને જરૂર પડ્યે ઉચ્ચ સ્તરીય રજૂઆત કરવી જોઈએ.

પોલીસે ગુમ થયેલા 2 કોન્સ્ટેબલ વિરુદ્વ નોંધ્યો ગુનો

અમદાવાદના નવરંગપુરાના 2 કોન્સ્ટેબલ ગુમ થવાના મામલે પોલીસે ગુમ થયેલા 2 કોન્સ્ટેબલ વિરુદ્વ ગુનો નોંધ્યો છે. તેમણે બળજબરીથી પૈસા પડાવવા મુદ્દે ગુનો નોંધ્યો છે. નિશિથ નામના શખ્સ પાસેથી રૂપિયા 2 લાખ પડાવ્યા હોવાની અરજી થઇ હતી. અરજીની તપાસમાં સમગ્ર મામલો સામે આવતા ગુનો નોંધાયો છે.