અમદાવાદ / પ્રોપર્ટી ટેક્સના ડિફોલ્ટર્સ સામેની AMC મેગા સીલિંગ ઝુંબેશ, વન ટાઇમ સેટલમેન્ટ યોજના હેઠળ આપ્યું 71.77 કરોડનું રિબેટ

• AMCની વન ટાઇમ સેટલમેન્ટ યોજના
• કરદાતાઓને રૂ. ૭૧.૭૭ કરોડનું રિબેટ
• ૧૦ હજારથી વધુ કોમર્શિયલ મિલકતને તાળાં લાગશે

અમદાવાદ મ્યુનિસિપલ કોર્પોરેશનના પ્રોપર્ટી ટેક્સ વિભાગ દ્વારા પ્રોપર્ટી ટેક્સની આવકમાં વૃદ્ધિ કરવા બાકી કરદાતાઓ માટે વન ટાઇમ સેટલમેન્ટ યોજના જાહેર કરાઈ છે. તે અંતર્ગત ડિફોલ્ટર જો મૂડી ભરે તો તેને વ્યાજમાંથી ૧૦૦ ટકા મુક્તિ અપાઈ રહી છે. મ્યુનિસિપલ તંત્રના ઇતિહાસમાં પહેલી વખત વન ટાઇમ સેટલમેન્ટ યોજના જાહેર કરાઈ હોઈ તેને બાકી કરદાતાઓએ ઉમળકાભેર વધાવી લીધી છે. જેના કારણે આ યોજનાનો લાભ લેનારા કરદાતાઓને ગઈ કાલ સુધી રૂ. ૭૧.૭૭ કરોડ જેટલી માતબર રકમનું રિબેટ અપાયું છે. 

વન ટાઇમ સેટલમેન્ટ યોજના
ગત તા. ૧૪ ફેબ્રુઆરી, ૨૦૨૩થી ૨૮ ફેબ્રુઆરી, ૨૦૨૩ સુધી વન ટાઇમ સેટલમેન્ટ યોજના હેઠળ મ્યુનિસિપલ તિજોરીમાં રૂ. ૧૨૭.૬૬ કરોડની આવક થઈ હતી. જે પૈકી ઉત્તર-પશ્ચિમ ઝોનમાંથી સૌથી વધુ ૨૭.૮૬ કરોડ અને ઉત્તર ઝોનમાંથી સૌથી ઓછી રૂ. ૧૦.૬૬ કરોડની આવક થવા પામી હતી. મધ્ય ઝોનમાં રૂ. ૧૫.૧૨ કરોડ, દક્ષિણ ઝોનમાં ૧૦.૮૮ કરોડ, પૂર્વ ઝોનમાં ૧૭.૪૩ કરોડ, પશ્ચિમ ઝોનમાં રૂ. ૨૬.૦૪ કરોડ અને દક્ષિણ-પશ્ચિમ ઝોનમાંથી રૂ. ૧૯.૬૩ કરોડની આવક તંત્રએ વન ટાઇમ સેટલમેન્ટ યોજના હેઠળ રળી હતી. 

જ્યારે ચાલુ માર્ચ મહિનાની તા. ૧ માર્ચ, ૨૦૨૩થી ગઈ કાલ સુધી આ યોજના હેઠળ મેળવેલી આવકના આંકડા પણ ઉત્સાહજનક છે. આટલા સમયગાળામાં જ પ્રોપર્ટી ટેક્સ વિભાગે રૂ. ૧૨૭.૬૬ કરોડની આવક પ્રાપ્ત કરી છે. આ યોજના અંતર્ગત અત્યાર સુધીમાં તંત્રને કુલ રૂ. ૨૬૩.૦૧ કરોડની આવક થઈ હોવાનું મ્યુનિસિપલ રેવન્યૂ કમિટીના ચેરમેન જૈનિક વકીલ જણાવે છે.

મ્યુનિસિપલ રેવન્યૂ કમિટીના ચેરમેન જૈનિક વકીલ વધુમાં જણાવે છે કે આજે પણ શહેરમાં ડિફોલ્ટર્સ સામે મેગા સીલિંગ ઝુંબેશ હાથ ધરાઈ છે. બાકી કરદાતાઓ માટે વન ટાઇમ સેટલમેન્ટ યોજના જેવી આકર્ષક યોજના અમલમાં મુકાઈ હોવા છતાં પ્રોપર્ટી ટેક્સ ભરવાનું ટાળતાં કરદાતાઓ સામે સીલિંગ ઝુંબેશ જેવાં આકરાં પગલાં પણ લેવાઈ રહ્યાં હોઈ આજે વધુ ૧૦ હજાર કોમર્શિયલ મિલકતને તંત્રનાં સીલ લાગશે.

તંત્રને આવકમાં ૨૦.૩૦ ટકા જેટલો ઉલ્લેખનીય વધારો
આજે સવારના સાડા પાંચ વાગ્યાથી ટેક્સ વિભાગની ટીમ શહેરભરમાં બાકી કરદાતાઓના કોમર્શિયલ એકમને તંત્રનાં ખંભાતી તાળાં મારવા માટે મેદાનમાં ઊતરી હતી, જેમાં જે તે ઝોનના ડેપ્યુટી મ્યુનિ. કમિશનર, આસિ. મ્યુનિ. કમિશનર અને ઝોનના ટેક્સ વિભાગના વડા સહિતના ઉચ્ચ અધિકારીઓ જોડાયા હતા. આ લખાય છે ત્યારે સવારના ૧૧.૦૦ વાગ્યા સુધીમાં શહેરની બે હજારથી વધુ મિલકતને તંત્રએ સીલ મારી દેવાતાં ડિફોલ્ટર્સમાં ગભરાટ પ્રસરી ગયો છે અને પોતાની દુકાન, ઓફિસ કે ગોડાઉનને લાગેલા સીલને ખોલાવવા માટે ડિફોલ્ટર્સ દોડતા થઈ ગયા છે.દરમિયાન, ચાલુ નાણાકીય વર્ષ ૨૦૨૨-૨૩માં મ્યુનિ. તંત્રને ગઈ કાલ સુધી પ્રોપર્ટી ટેક્સમાં આવક પેટે રૂ. ૧૨૪૬.૮૨ કરોડની આવક થઈ છે, જે ગયા નાણાકીય વર્ષમાં આટલા જ સમયગાળામાં થયેલી રૂ. ૧૦૩૬.૩૮ કરોડની આવક કરતાં રૂ. ૨૧૦.૪૩ કરોડ જેટલી વધારે છે. એટલે કે તંત્રને આવકમાં ૨૦.૩૦ ટકા જેટલો ઉલ્લેખનીય વધારો થયો છે. 

દર નાણાકીય વર્ષની જેમ રાબેતા મુજબ શહેરના સૌથી સમૃદ્ધ ગણાતા પશ્ચિમ ઝોનમાંથી તંત્રને સૌથી વધુ રૂ. ૨૯૩.૬૪ કરોડની આવક થઈ છે. ત્યાર બાદ આવકની દૃષ્ટિએ ઉત્તર-પશ્ચિમ રૂ. ૨૦૩.૪૪ કરોડ સાથે અવલ છે. મધ્ય ઝોનમાંથી રૂ. ૧૮૮.૬૯ કરોડ, પૂર્વ ઝોનમાંથી ૧૬૭.૮૮ કરોડ, દક્ષિણ-પશ્ચિમ ઝોનમાંથી રૂ. ૧૫૪.૧૨ કરોડ, ઉત્તર ઝોનમાંથી રૂ. ૧૧૯.૮૮ કરોડ અને દક્ષિણ ઝોનમાંથી સૌથી ઓછા રૂ. ૧૧૯.૧૭ કરોડની આવક તંત્રને થઈ છે. ચાલુ માર્ચ મહિનામાં તા. ૧થી ૧૬ માર્ચ એટલે કે ગઈ કાલ સુધી તંત્રને રૂ. ૧૩૭.૫૫ કરોડની આવક થઈ છે, જેમાં ગઈ કાલે એક જ દિવસે રૂ. ૭.૭૨ કરોડની માતબર રકમ તંત્રે મેળવી હતી.

વન ટાઇમ સેટલમેન્ટ યોજનામાં ઉત્તર-પશ્ચિમ ઝોન સૌથી આગળ
તંત્રની વન ટાઇમ સેટલમેન્ટ યોજના હેઠળ ઉત્તર-પશ્ચિમ ઝોનમાંથી સૌથી વધુ રૂ. ૫૬.૬૬ કરોડની આવક પ્રાપ્ત કરાઈ છે, જ્યારે પશ્ચિમ ઝોનમાંથી રૂ. ૪૫.૬૯, દક્ષિણ-પશ્ચિમમાંથી રૂ. ૪૦.૦૪, પૂર્વ ઝોનમાંથી ૩૯.૪૫, મધ્ય ઝોનમાંથી ૩૩.૨૯, દક્ષિણ ઝોનમાંથી રૂ. ૨૪.૭૯ અને ઉત્તર ઝોનમાંથી સૌથી ઓછી રૂ. ૨૩.૦૪ કરોડની આવક આ યોજના હેઠળ પ્રોપર્ટી ટેક્સ વિભાગને થઈ છે.