ડબલ મર્ડર / મારી ગલીમાં આવીને બતાવ... છોકરીની ચેલેન્જ પર પહોંચ્યા બે યુવક તો થઈ ગયું મર્ડર, કારણ છે Instagram!

• સોશિયલ મીડિયામાં બોલાચાલી પર ડબલ મર્ડર
• આરોપી યુવતીએ યુવકને રસ્તા પર આવવાની ચેલેન્જ કરી
• બન્ને યુવક પર છરીના ઘા મારીને હત્યા કરવામાં આવી હતી

ઉત્તર દિલ્હીના બહારની બાજુ ભલસ્વા ડેરીના મુકુંદપુર વિસ્તારમાં બુધવારે મોડી રાત્રે સાહિલ અને નિખિલ નામના બે યુવકોની છરીના ઘા મારીને હત્યા કરવામાં આવી હતી. પોલીસે આ મામલે યુવતી અને તેના સગીર ભાઈ સહિત ચાર આરોપીઓની ધરપકડ કરી છે. તેમજ આરોપીઓ પાસેથી હત્યામાં વપરાયેલ હથિયાર પણ મળી આવ્યું છે.

સોશિયલ મીડિયામાં કોમેન્ટને લઈને વિવાદ
પોલીસના જણાવ્યા પ્રમાણે ઈન્સ્ટાગ્રામ પર એક કોમેન્ટને લઈને એક યુવતી અને નિખિલ વચ્ચે બોલાચાલી થઈ હતી. યુવતીએ તેને શેરીમાં આવીને દેખાડવાનો પડકાર ફેંક્યો હતો. પછી વિવાદ એટલો વધી ગયો કે નિખિલ રાત્રે સાહિલને લઈને ત્યાં પહોંચી ગયો. આ પછી, છોકરીએ સગીર છોકરાઓને ભેગા કર્યા. આ દલીલ દરમિયાન આરોપીઓએ નિખિલ અને સાહિલને છરીના ઘા મારીને હત્યા કરી નાખી હતી.

બન્ને યુવકો મજુરી કામ કરતા
પોલીસના જણાવ્યા અનુસાર મુકુંદપુર પાર્ટ 2, ગલી નંબર 14 પાસે બુધવારે રાત્રે 12 વાગ્યાની આસપાસ બે યુવકોને છરીના ઘા મારવામાં આવ્યા છે. પોલીસ ઘટના સ્થળે પહોંચી હતી. બંનેની ઓળખ 26 વર્ષીય નિખિલ અને 19 વર્ષીય સાહિલ તરીકે થઈ હતી. નિખિલ આઝાદપુર મંડીમાં એક છોટા હાથી ચલાવતો હતો, જ્યારે સાહિલ મંડીમાં મજૂરી કામ કરતો હતો. નિખિલ અને તેના માતાપિતા મુકુંદપુર ભાગ 2 માં રહેતા હતા. થોડા સમય પહેલા નિખિલનો પરિવાર ગાઝિયાબાદ શિફ્ટ થઇ ગયો હતો. નિખિલના કાકા હજી પણ મુકુંદપુરમાં રહે છે, તો નિખિલ આવતો-જતો રહે છે. સાહિલ શેરી નંબર 14માં રહે છે, જ્યાં આરોપી યુવતી પરિવાર સાથે રહે છે.

છોકરીને ઘણા યુવકો સાથે મિત્રતા
પોલીસ સૂત્રોએ જણાવ્યું હતું કે, "નિખિલ અને આરોપી યુવતીના પોતાના ઇન્સ્ટાગ્રામ એકાઉન્ટ છે. બંને વચ્ચે ફોલોઅર્સ અને કોમેન્ટ્સને લઈને વિવાદ થયો હતો. આ વિવાદમાં બુધવારે આરોપી યુવતીએ નિખિલને ત્યાં રસ્તા પર ન આવવાનો પડકાર ફેંક્યો હતો. ત્યારબાદ નિખિલ સાહિલને મુકુંદપુર ગલી નંબર 14માં લઈ ગયો, જ્યાં યુવતીએ પોતાના સગીર ભાઈ અને અન્ય છોકરાઓને જગડા માટે તૈયાર કરી દીધા હતા. બંને ત્યાં પહોંચતા જ તેમને છરીના ઘા ઝીંકી દીધા હતા. તપાસમાં સામે આવ્યું કે, છોકરીની ઘણા છોકરાઓ સાથે મિત્રતા છે, માતા બીમાર છે અને પિતા મજૂરી કામ કરે છે.