અમદાવાદ / 'બીચ મેં ક્યોં ગાડી ચલાતે હો?' કહી બે અજાણ્યા શખ્સોએ ત્રણ લોકો પર ઝીંકી દીધા છરીના ઘા, જાણો શું છે સમગ્ર મામલો

• કાર સાઈડમાં કરવાનું કઈ દંપતિ પર છરી વડે બે શખ્સે કર્યો હુમલો
• તુમ્હારે બાપ કા રોડ હૈં?’ કહીને બંને શખ્સોએ છરી વડે કર્યો હુમલો
• પોલીસ સ્ટેશનમાં અજાણ્યા શખ્સો વિરુદ્ધ હુમલાની ફરિયાદ કરાઈ

અમદાવાદ શહેરના રાયખડ વિસ્તારમાં ગઇ કાલે બે અજાણ્યા શખ્સોએ વાહન ચલાવવા બાબતે ત્રણ યુવકો પર છરી વડે હુમલો કરતાં મામલો પોલીસ સ્ટેશન સુધી પહોંચ્યો છે. નારણપુરામાં રહેતું દંપતી તેમની દીકરી અને સ્વજનો સાથે બાપુનગર જઇ રહ્યા હતા ત્યારે દીકરીને ઊલટી થતાં કાર સાઇડમાં ઊભી રાખી હતી. દરમિયાનમાં બે શખ્સો આવ્યા હતા અને દંપતી સાથે બબાલ કરીને ગાળો બોલવા લાગ્યા હતા. ‘બીચ મેં ક્યોં ગાડી ચલાતે હો? તુમ્હારે બાપ કા રોડ હૈં?’ કહીને બંને શખ્સોએ ત્રણ યુવકો પર છરી હુલાવી દીધી હતી. 

કારને રાયખડ ચોકડી પાસે અટકાવી હતી
નારણપુરા વિસ્તારમાં આવેલા ઉદય એપાર્ટમેન્ટમાં રહેતા ચેતનાબહેન કનુભાઇ દેસાઇએ ગાયકવાડ હવેલી પોલીસ સ્ટેશનમાં અજાણ્યા શખ્સો વિરુદ્ધ હુમલાની ફરિયાદ કરી છે. ગઇ કાલે ચેતનાબહેન તેમના પતિ કનુભાઇ, દીકરી વિશ્વા, કૌટુંબિક દિયર સુનીલ તેમજ જયેશ વાઘેલા કારમાં બેસીને સંબંધી ઇશ્વરભાઇ દેસાઇને બાપુનગર મળવા માટે ઘરેથી નીકળ્યા હતા. મોડી રાતે વિશ્વાને ઊલટી થતાં કનુભાઇએ કાર સાઇડમાં ઊભી રાખી હતી. વિશ્વા ઊલટી કરી રહી હતી ત્યારે સુનીલ પાણીની બોટલ લેવા માટે ગયો હતો. દરમિયાનમાં એક ટુવ્હીલર પર બે શખ્સો આવ્યા હતા અને કનુભાઇ સાથે બબાલ કરવા લાગ્યા હતા. દેખતા નહીં ક્યા, દેખ કે ચલાવો એમ કહીને બે શખ્સો કનુભાઇને આગે ચોકડી પે આ જાઓ તેમ જણાવીને જતા રહ્યા હતા. બંને શખ્સોએ કનુભાઇની કારને રાયખડ ચોકડી પાસે અટકાવી હતી અને બબાલ કરીને કહેવા લાગ્યા હતા કે, ‘બીચ મેં ક્યોં ગાડી ચલાતે હો? તુમ્હારે બાપ કા રોડ હૈં?’     

ટુવ્હીલરનો નંબર લઇને પોલીસ કંટ્રોલરૂમમાં ફોન કર્યો હતો
કનુભાઇ, ચેતનાબહેન, જયેશ અને સુનીલ કારની બહાર ઊતર્યા ત્યારે બંને શખ્સોએ કનુભાઇ પર હુમલો કરી દીધો હતો. બે શખ્સો પૈકી એક શખ્સે પોતાની પાસે રહેલી છરી કાઢી હતી અને કનુભાઇ પર હુલાવી દીધી હતી. કનુભાઇને લોહી નીકળતાં જયેશ અને સુનીલ વચ્ચે છોડાવવા માટે પડ્યા હતા જ્યાં બંને શખ્સો તેમને પણ છરી મારી દીધી હતી. દરમિયાનમાં એક શખ્સે પોતાની જાત પર છરી વડે હુમલો કરી દીધો હતો અને કહેવા લાગ્યો હતો કે તુમ સબકો ફિટ કરવા દૂંગા. તેઓ એમ કહીને નાસી ગયા હતા. ચેતનાબહેને ટુવ્હીલરનો નંબર લઇને પોલીસ કંટ્રોલરૂમમાં ફોન કરી દીધો હતો. ઇજાગ્રસ્ત કનુભાઇ, જયેશ અને સુનીલને સારવાર માટે હોસ્પિટલ ખસેડવામાં આવ્યા હતા, જ્યારે ગાયકવાડ હવેલી પોલીસે બે અજાણ્યા શખ્સો વિરુદ્ધ હુમલાનો ગુનો દાખલ કરીને તપાસ શરૂ કરી છે.