અબુધાબી / IPLની આ બે ટીમ આવતાં વર્ષે T 10 લિગમાં રમે તેવી શક્યતા

• t-10 લીગ રમવા માટે આઇપીએલની ટીમના ખેલાડીઓએ પણ ડ્રાફ્ટની પ્રક્રિયામાં ભાગ લેવો પડશે
• t-10 લીગની મેચ અને સમય વધારવા અંગે વિચારણા થઈ રહી 
• બીજી ક્રિકેટ લીગની જેમ અહીં પણ ટીમ નામ બદલીને રમશે, જોકે ટીમની માલિકી અને મેનેજમેન્ટ નહીં બદલાય

આગામી વર્ષે આઇપીએલની બે ટીમ ભાગ લેશે તો ટીમની સંખ્યા વધીને દસ થઈ શકે છે

નવાબ શાજીએ જોકે એ બંને  ટીમનાં નામ આપવાનો ઇનકાર કરી દીધો હતો. તેમણે કહ્યું, ''ગત વર્ષે અમે t-10 લીગમાં ટીમની સંખ્યા છથી વધારીને આઠ કરી  હતી. આગામી વર્ષે આઇપીએલની બે ટીમ ભાગ લેશે તો ટીમની સંખ્યા વધીને દસ થઈ શકે છે.'' શાજીને એવું પૂછવામાં આવ્યું હતું કે, ''શું આઇપીએલની ટીમ t-10 લીગમાં રમશે તો બીસીસીઆઇ સાથે હિતોના ટકરાવનો મુદ્દો ઊભો નહીં થાય?'' એ સવાલના જવાબમાં તેમણે જણાવ્યું, ''બીજી ક્રિકેટ લીગની જેમ અહીં પણ ટીમ નામ બદલીને રમશે, જોકે ટીમની માલિકી અને મેનેજમેન્ટ નહીં બદલાય. ઉદાહરણ તરીકે જો કોલકાતા નાઇટરાઇડર્સ ભાગ લે તો તેનું લીગમાં નાઇટરાઇડર્સ નામ હોઈ શકે છે. t-10 લીગ રમવા માટે આઇપીએલની ટીમના ખેલાડીઓએ પણ ડ્રાફ્ટની પ્રક્રિયામાં ભાગ લેવો પડશે.''

હાલ તો સિંગલ રાઉન્ડ યોજાય છે, જેને ડબલ રાઉન્ડ કરી દેવાશે

નવાબ શાજીએ જણાવ્યું, '' t-10 લીગની મેચ અને સમય વધારવા અંગે વિચારણા થઈ રહી છે. આ લીગને ૧૦ દિવસ અને ૨૯ મેચથી વધારીને ૧૫ દિવસ અને ૫૦ મેચની કરાઈ શકે છે. હાલ તો સિંગલ રાઉન્ડ યોજાય છે, જેને ડબલ રાઉન્ડ કરી દેવાશે. આ અંગે વર્તમાન લીગ પૂરી થયા બાદ નિર્ણય લેવાશે.'' ભારતમાં t-10 લીગ શરૂ કરવાની શક્યતાઓ અંગે સવાલ કરવામાં આવતાં શાજીએ જણાવ્યું, ''એ અંગે તો બીસીસીઆઇ જ જણાવી શકે. અમે જોકે આ અંગે કોશિશ કરી રહ્યા છીએ. અમે ઇચ્છીએ છીએ કે ભારતમાં પણ આ લીગની શરૂઆત થાય, પછી ભલે એ જિલ્લા કે રાજ્ય સ્તરે કેમ ના હોય.''

આગામી વર્ષે ઈંગ્લેન્ડમાં શરૂ થનાર 'ધ હન્ડ્રેડ બોલ' ટૂર્નામેન્ટના પડકાર અંગે પૂછવામાં આવતાં નવાબ શાજીએ કહ્યું, ''સ્પર્ધા ફોર્મેટને લઈ નહીં, અધિકાર ક્ષેત્ર અંગે હોય છે. ઈંગ્લેન્ડની લીગને ઈંગ્લેન્ડમાં પડકાર મળશે. ટી-૨૦ની ૫૦ ઓવરની મેચ સાથે કોઈ સ્પર્ધા નથી, તેની સ્પર્ધા ટી-૨૦ સાથે જ છે. અલગ ફોર્મેટમાં ક્યારેય કોઈ જ સ્પર્ધા હોતી નથી.''