રાજ્યમાં રખડતાં ઢોરની સમસ્યા અટકવાનું નામ જ લેતી નથી. તેવામાં અમદાવાદ અને તાપીમાં 24 કલાકમાં જ રખડતા ઢોરના આતંકની બે ઘટના સામે આવી છે.
રાજ્યમાં રખડતા ઢોરના આતંકની બે ઘટના
અમદાવાદમાં ઢોરની અડફેટે ચડેલા યુવાનનું મોત
તાપીના વ્યારામાં બાઇકોનો ભુક્કો
રખડતા ઢોર સામે કાર્યવાહીની મોટી મોટી વાતો વચ્ચે પણ ગુજરાતમાં રખડતા ઢોરનો આતંક આસમાને જોવા મળી રહ્યો છે. જેના બોલતા પુરાવા રુપ 24 કલાકમાં રખડતા ઢોરના આતંકની બે ઘટના સામે આવી છે. અમદાવાદના નરોડા વિસ્તારમાં રખડતા પશુએ વધુ એક યુવાનને અડફેટે લેતા તેનું મોત નીપજ્યું છે. વધુમાં વ્યારાના સુરતી બજાર પાસે આખલા યુદ્ધ જામ્યું હતું. જેમાં 15 થી વધુ બાઇકને નુકસાન થવા પામ્યું હતું આથી લોકોમાં આક્રોશનો કોઇ પાર નથી.
બાઇકની અડફેટે ઘવાયેલા યુવાનનું મોત
આજે અમદાવાદના નરોડા વિસ્તારમાં કરુણ ઘટના બની હતી. જેમાં બાઈક સવાર યુવકને રખડતા ઢોરે અડફેટે લેતા અકસ્માત સર્જાયો હતો. આ ઘટનામાં યુવકને માથાના ભાગમાં ગંભીર ઇજા પહોંચી હતી. આથી તેને લોહીલુહાણ હાલતમાં હોસ્પિટલ ખસેડાયો હતો. જ્યાં ભાવિન પટેલને બ્રેઈનમાં મલ્ટિપલ હેમરેજ થયું હોવાનું તબીબી રિપોર્ટમાં સામે આવ્યું હતું. જોકે અંતે યુવકને માથાના ભાગમાં ગંભીર ઇજા થતા હોસ્પિટલમાં ઈજાગ્રસ્ત ભાવિન પટેલનું સારવાર દરમિયાન મોત નીપજ્યું હતું. આ ઘટનાથી બે નાની દીકરીઓ નોંધારી બનતા પરિવારમા કાળો કલ્પાંત ફેલાયો છે અને જવાબદાર અધિકારીઓ સામે કાર્યવાહી કરવા પરિવાર માંગ કરી રહ્યો છે. ત્યારબાદ પોલીસે ગુન્હો નોંધી તપાસ હાથ ધરી છે.
તાપીના વ્યારામાં 15થી વધુ બાઇકને નુકસાન
રખડતા ઢોરના ત્રાસની વધુ એક ઘટના તાપી જિલ્લામાં સામે આવી હતી. જેમાં તાપીના વ્યારાના સુરતી બજાર પાસે 2 આખલા બાખડ્યા હતા. જોત જોતાંમાં 2 આખલા વચ્ચે મોટા પાયે ધિંગાણું ખેલાયું હતું જેથી લોકોને અહિથી પસાર થવું મુશ્કેલ બન્યું હતું. આ યુદ્ધમાં રસ્તા પર પાર્ક કરાયેલી 15થી વધુ બાઇકને નુકસાન થયું હતું. આમ બંને શહેરોમાં રખડતા ઢોરને પકડવામાં પ્રશાસનની નિષ્ક્રિયતા જોવા મળી રહી છે.
સપ્ટેમ્બરમાં રાજ્યભરમાં રખડતા ઢોરના કારણે 471 લોકોના અકસ્માત થયા
અત્રે નોંધનીય છે કે, રાજ્યભરમાં સપ્ટેમ્બર મહિનામાં કુલ 471 લોકોના રખડતા ઢોરના કારણે અકસ્માત સર્જાયા છે. આ 471 લોકોને 108 દ્વારા હોસ્પિટલ ખસેડવામાં આવ્યા છે. જેમાં સોથી વધુ અમદાવાદમાં 52 લોકોના અકસ્માત થયા છે. જ્યારે અમરેલીમાં 17, આણંદમાં 8, અરવલ્લીમાં 17 લોકો, બનાસકાંઠામાં 21, ભરૂચમાં 10 અને ભાવનગરમાં 19 લોકોના અકસ્માત થયા છે.