ગીરસોમનાથના ડોળાસા યાર્ડમાં કપાસની હરરાજી શરૂ કરવામાં આવી હતી. આજે હરાજીના પ્રથમ દિવસે ખેડૂતોને પ્રતિ 20 કિલો કપાસના વધુને વધુ ભાવ 2260 અને નીચામાં નીચા 1860 જેટલા ભાવ મળ્યા હતા. પછાળના વર્ષોની સરખામણીએ આ ભાવ ઊંચા ગણવામાં આવી રહ્યા છે. જ્યારે ખેડૂતો હજુ કપાસના બજાર ભાવ 2500 થી લઈને 3000 સુધી મળી રહે તેવી માંગ કરી રહ્યા છે.
માર્કેટિંગ યાર્ડના વેપારીઓને કપાસની આવક વધવાની આશા
આજે હરાજીના પ્રથમ દિવસે પ્રતિ 20 કિલો કપાસનો સરેરાશ બજાર ભાવ 1900 રૂપિયાથી લઈને 2100 રૂપિયા સુધી જોવા મળ્યો હતો. જે પણ પાછલા વર્ષોનો સર્વોચ્ચ માનવામાં આવી રહ્યો છે. આજના દિવસે 500 મણ કપાસની આવક ડોળાસા સબ યાર્ડમાં થઈ હતી. ગીર સોમનાથ જિલ્લાના વિસ્તારને લીલી નાઘેર તરીકે કૃષિ જગતમાં ઓળખવામાં આવે છે. અહીં મગફળીનું વધુ પ્રમાણમાં વાવેતર થતું આવ્યું છે. પરંતુ પાછલા કેટલાક વર્ષોથી મગફળીની સાથે હવે કપાસનુ વાવેતર પણ સતત વધી રહ્યું છે. જોકે છેલ્લા કેટલાક વર્ષોથી કપાસના વાવેતરમાં ઘટાડો નોંધાયો હતો કારણ કે અપૂરતા ભાવ અને વધુ ખર્ચના કારણે ખેડૂતોનો કપાસ પરથી મોહ ભંગ થયો હતો,
કપાસનું 18940 હેક્ટરમાં વાવેતર થયું
પરંતુ ચાલુ વર્ષે જિલ્લામાં કપાસનું નોધપત્ર એટલે કે 18940 હેક્ટરમાં વાવેતર થયું છે. કમોસમી વરસાદ અને કપાસના પાકમાં વરસાદને કારણે આવેલા રોગ અને જીવાતથી કપાસના પાકમાં ઉતારા પર માઠી અસર પડી છે. તેમ છતાં આજે ડોળાસા માર્કેટિંગ યાર્ડમાં સારા કપાસના બજાર ભાવ 2260 સુધી જોવા મળ્યા હતા. જેમને લઈ ખેડૂતોમાં કહી ખુશી તો કહી ગમ જોવા મળી રહ્યો છે.