દુર્ઘટના / સુરતમાં પુરપાટ ઝડપે સ્પોર્ટ્સ બાઈક લઇને નીકળેલા 2 મિત્રોના અકસ્માતે મોત, બર્થડેમાં જ ખરીદી હતી બાઈક

• સુરતમાં સ્પોર્ટ્સ બાઈક લઈને નીકળેલા 2 મિત્રોને કાળ ભરખી ગયો
• એકટીવાને ઓવરટેક કરવાના ચક્કરમાં સર્જાયો અકસ્માત
• બાઈકચાલકનું ઘટનાસ્થળે મોત, મિત્રનું સારવાર દરમિયાન મોત

સાયણ ગામમાં સાયણ-શુગર રોડ પરની નહેર કોલોનીમાં રહેતા રાકેશ વિનોદભાઈ વસાવા(બાઈક ચાલક) અને કાર્તિક સુંદર વસાવા(ચાલકના મિત્ર)નું અકસ્માતે મોત થયું છે. નવી ખરીદેલી સ્પોર્ટ્સ બાઈક પર 24 ઓક્ટોબરે બન્ને મિત્રો ઓલપાડથી સાયણ આવી રહ્યા હતા. આ દરમિયાન એક્ટિવાને ઓવરટેક કરવા પુરપાટ ઝડપે બાઈક ચલાવતો હતો આ સમયે અકસ્માત સર્જાયો હતો.

બાઈકચાલકનું ઘટનાસ્થળે મોત, મિત્રનું સારવાર દરમિયાન મોત

સ્પોર્ટ બાઇક ચલાક રાકેશ વસાવા રોડ પર પટાકાતા ગંભીર ઇજાઓ થઇ હતી, જેના કારણે તેમનું ઘટના સ્થળે જ મોત નીપજ્યું હતું. જ્યારે તેના મિત્ર કાર્તિકને પણ ગંભીર ઇજાઓ પહોંચી હતી, તેને સારવાર અર્થે તાત્કાલિક હોસ્પિટલ ખસેડવામાં આવ્યો હતો, પરંતુ તેમનું સારવાર દરમિયાન મોત નીપજ્યુંહ તું. બન્ને મિત્રોને કાળ ભરખી ગયો હતો. હાલ બન્નેના પરિવાર પર આભ તુટી પડ્યું છે. સમગ્ર પંથકમાં શોકની લાગણી ફેલાઇ ગઇ છે.

18 દિવસ પહેલા જ ઘરે બાળકનો થયો હતો જન્મ

સાયણ ગામના રાકેશ વિનોદભાઈ વસાવાના ઘરે 18 દિવસ પહેલા જ બાળકનો જન્મ થયો હતો. ત્યારે હવે આ દુર્ઘટના બનતા સમગ્ર પરિવાર ઘેરા શોકમાં ગરકાવ થયો છે.

13 ઓક્ટોબરે પોતાના જન્મદિવસે જ રાકેશે ખરીદી હતી સ્પોર્ટ્સ બાઈક

ગત 13 ઓક્ટોબરના રોજ રાકેશ વસાવાનો જન્મ દિવસ હતો. રાકેશને સ્પોર્ટ્સ બાઈકનો ખુબ જ શોખ હોવાથી તેમણે જન્મદિવસે જ યામાહા કંપનીની R15 સ્પોર્ટ બાઈક ખરીદી હતી, તો આ બાઈકનો હજુ રજીસ્ટર નંબર પણ આવવાનો બાકી હતો.

દેશમાં અને રાજ્યમાં અકસ્માતના નિવારણ માટે અનેક કાયદાઓ બનાવવામાં આવ્યા છે. લોકોને જાગ્રૃતિ માટે ઠેકઠેકાણે સંભવિત અકસ્માતના બોર્ડ પણ લગાવાયા છે. હેલ્મેટ પહેરાવને પણ ફરજિયાત કરાયું છે. ઓવરસ્પીડ પર પણ બ્રેક લગાવવામાં આવી છે. છતાં પણ ઓવર કોન્ફિડન્સમાં લોકો કોઇ એવી ભૂલ કરી બેસે છે જેના કારણે તેનું પરિણામ ખુબ જ ખરાબ આવે છે. સુરતમાં બનેલી ઘટનાએ એક દુર્ઘટના નહીં પરંતુ તેને ગંભીરતાથી લેવી જરૂરી છે. લોકોએ જાહેર રોડ-રસ્તા પર પોતાના વાહનને ધ્યાનથી ચલાવવું જોઇએ અને પોતાની, પોતાના પરિવારની અને રોડ પરથી પસાર થતા વાહનચાલકોની પણ ચિંતા કરવી જોઇએ. નહીં તો... ઝડપની મજા મોતની સજા... સાબિત થશે.