ટૅલિકૉમ / 5G માટેની તૈયારી : JIOએ 57,000 કરોડ ખર્ચ્યા, હવે મુકેશ અંબાણીની કંપની પાસે તમામ સર્કલમાં સ્પેક્ટ્રમ

• મોદી સરકારને મળી મોટી રકમ 
• જિયોએ આશરે 57000 કરોડ ખર્ચ્યા 
• અન્ય કંપનીઓએ પણ ખરીદ્યા સ્પેક્ટ્રમ

ટેલિકોમ સચિવે કહ્યું કે બે દિવસમાં રૂ .77,814.80 કરોડની સ્પેક્ટ્રમની ખરીદી કરવામાં આવી છે.ટેલિકોમ સચિવે કહ્યું કે સોમવારે 2,250 મેગાહર્ટઝ સ્પેક્ટ્રમની હરાજી શરૂ થઈ. તેની આરક્ષિત કિંમત આશરે ચાર લાખ કરોડ રૂપિયા હતી. હરાજીમાં 800 મેગાહર્ટઝ, 900 મેગાહર્ટઝ, 1800 મેગાહર્ટઝ, 2100 મેગાહર્ટઝ અને 2300 મેગાહર્ટઝ બેન્ડમાં બિડ મળી હતી. પરંતુ 700 અને 2500 મેગાહર્ટઝમાં કોઈ બિડ મળી નથી.

રિલાયન્સ જિયો ઇન્ફોકોમ લિમિટેડ (“RJIL”)એ જાહેરાત કરી છે કે, તાજેતરમાં ભારત સરકારના ટેલિકમ્યુનિકેશન વિભાગ દ્વારા હાથ ધરાયેલી સ્પેક્ટ્રમની હરાજીમાં ભારતના તમામ 22 સર્કલમાં ઉપયોગ કરી શકાય તે મુજબના સ્પેક્ટ્રમ સફળતાપૂર્વક હાંસલ કર્યા છે.

RJILની માલિકીના સ્પેક્ટ્રમ 55 ટકા વધીને 1717 MHZ થયા છે. સબ-GHZ અને 2300 બેન્ડ્સમાં સૌથી વધુ સ્પેક્ટ્રમ હોલ્ડિંગ હવે જિયો પાસે છે.

આ સાથે જ જિયો દ્વારા તમામ સર્કલમાં 1800 MHZમાં લઘુત્તમ 2X10 અને 2300 MHZમાં 40 MHZ સાથે સ્પેક્ટ્રમ ફૂટપ્રિન્ટ વધારવામાં આવી છે.

15.5 વર્ષની સરેરાશ સ્પેક્ટ્રમ માલિકીની વેલિડિટી સાથે RJIL દ્વારા સંપૂર્ણ સ્પેક્ટ્રમ હકો હાંસલ કર્યા છે. જેમાં ખાસ કરીને 5G ટેક્નોલોજીના ઉપયોગ માટે જરૂરી સ્પેક્ટ્રમ હાંસલ કર્યું

વોડાફોન-આઈડિયા: 1993 કરોડની સ્પેક્ટ્રમ ખરીદી

ટેલિકોમ સેક્રેટરીએ માહિતી આપી કે વોડાફોન-આઇડિયાએ આ હરાજીમાં 1,993.40 કરોડના સ્પેક્ટ્રમની ખરીદી કરી છે. કંપનીએ કહ્યું કે પાંચ સર્કલની હરાજીમાં તેણે જે સ્પેક્ટ્રમ ખરીદ્યું છે તે 4 જી કવરેજ અને ક્ષમતા વધારવામાં મદદ કરશે. કંપનીએ કહ્યું કે આનાથી તે તેના ગ્રાહકોને 'શાનદાર ડિજિટલ અનુભવ' પ્રદાન કરી શકશે.

ભારતી એરટેલે 18,699 કરોડ સ્પેક્ટ્રમ ખરીદ્યો

ભારતી એરટેલે જણાવ્યું હતું કે તેણે 18,699 કરોડ રૂપિયાના સ્પેક્ટ્રમ મેળવ્યા છે. કંપનીએ કહ્યું કે આનાથી તેને ભવિષ્યમાં 5 જી સેવાઓ પૂરી પાડવામાં સફળતા મળશે. કંપનીએ કહ્યું કે હવે તેને દેશભરમાં ગીગાહર્ટ્ઝ સ્પેક્ટ્રમ મળી ગયો છે, જેથી કંપની હવે શહેરોમાં આવેલા ઘરો અને ઑફિસોની અંદરમાં પણ સારી કવરેજ આપી શકશે.

ઑપરેટરો શા માટે નવા સ્પેક્ટ્રમમાં રોકાણ કરવા માંગતા નથી

કુલ સ્પેક્ટ્રમમાંથી, 700 મેગાહર્ટઝ બેન્ડ સ્પેક્ટ્રમના ત્રીજા ભાગનો હિસ્સો ધરાવે છે. આ સ્પેક્ટ્રમનું વેચાણ 2016 ની હરાજીમાં થયું ન હતું. વિશ્લેષકોએ જણાવ્યું હતું કે ગીગાહર્ટઝ બેન્ડની નીચેના અન્ય સ્પેક્ટ્રમ ઓછા ભાવે ઉપલબ્ધ છે. તેથી મોટાભાગના ઑપરેટર્સ નવા સ્પેક્ટ્રમમાં રોકાણ કરવા માંગતા નથી, કારણ કે તેમને ઉપકરણો પર વધુ ખર્ચ કરવો પડશે.

જિયોએ 5 જી લોંચ માટેની તૈયારીઓ શરૂ કરી દીધી 

રિલાયન્સ જિયોએ બે દિવસીય ટેલિકોમ સ્પેક્ટ્રમ હરાજીમાં તમામ 22 સર્કલમાં સ્પેક્ટ્રમ ખરીદ્યો છે. આ ખરીદી પછી, રિલાયન્સ જિયો પાસે કુલ 1717 મેગા હર્ટ્ઝ (અપલિંક + ડાઉનલિંક) હશે જે પહેલા કરતા 55 ટકા વધારે છે. સ્પેક્ટ્રમની આ મોટી ખરીદી દ્વારા રિલાયન્સ જિયોને વધુ મજબુત બનાવવાની અપેક્ષા છે.રિલાયન્સ જિયો દ્વારા ખરીદેલા સ્પેક્ટ્રમનો ઉપયોગ 5 જી સેવા પ્રદાન કરવા માટે પણ થઈ શકે છે. રિલાયન્સ જિયોએ તાજેતરમાં જાહેરાત કરી હતી કે તેણે સ્વદેશી 5 જી ટેક્નોલોજી વિકસાવી છે, જેનું યુ.એસ. માં પરીક્ષણ કરવામાં આવ્યું છે. રિલાયન્સના માલિક મુકેશ અંબાણીએ પણ આ વર્ષે 5 જી સેવા શરૂ કરવાની જાહેરાત કરી છે.