ગાંધીનગર: ગુજરાતમાં આજે ભારે વરસાદની આગાહી હવામાન વિભાગે કરી છે. સૌરાષ્ટ્ર ઉત્તર-મધ્ય ગુજરાતમાં ભારે વરસાદની આગાહી કરવામાં આવી છે. દક્ષિણ ગુજરાતના જિલ્લામાં પણ અતિ ભારે વરસાદનું અનુમાન લગાવવામાં આવ્યું છે.
મળતી માહિતી અનુસાર બંગાળની ખાડીમાં નવી સિસ્ટમ સક્રિય થતાં ગુજરાતમાં બે દિવસ સુધી ભારે વરસાદ વરસી શકે છે.
દક્ષિણ ગુજરાતના જિલ્લાઓમાં જળબંબાકાર થવાની આગાહી કરવામાં આવી હતી. જો કે એ સંકટ ટળી ગયું હતું અને હવે મધ્યપ્રદેશ તરફ ફંટાઇ છે. એવા સમાચાર પ્રાપ્ત થયા હતા. પરંતુ આજે ફરીથી નવી સિસ્ટમ સક્રિય થતા રાજ્યમાં બે દિવસ ભારે વરસાદ પડી શકે છે.
ઉલ્લેખનીય છે કે ગુજરાતમાં એન્ટ્રી કરી સૌથી પહેલા દક્ષિણ ગુજરાતને ઘમરોળી નાખ્યુ છે. દક્ષિણ ગુજરાતના વાપી વલસાડ ઉમરગામ સુરત સહિતના વિસ્તારમાં મેઘરાજા એવા તો મનમૂકીને વરસ્યા કે સર્વત્ર જળબંબાકારની સ્થિતી સર્જાઇ છે. તો દક્ષિણ ગુજરાતને પાણી પાણી કર્યા બાદ મેઘરાજાની સવારી મધ્યગુજરાતમાં પણ આવી પહોંચી હતી.
દરમિયાન આજે અમદાવાદમાં વાતાવરણમાં પલટો આવતા શહેરના કેટલાક વિસ્તારોમાં વરસાદ વરસ્યો હતો. બોપલ સરખેજ હાઇવે અને એસપી રિંગ રોડ તરફ વરસાદ વરસ્યો હતો.