હવામાન / રાજ્યમાં આગામી બે દિવસ અતિભારે વરસાદની આગાહી, સૌરાષ્ટ્ર-મહેસાણામાં અલર્ટ

મેઘરાજાની ધમાકેદાર એન્ટ્રી અમદાવાદમાં થઇ છે ત્યારે હજી પણ બે દિવસ સુધી ગુજરાતમાં ભારે વરસાદની આગાહી હવામાન વિભાગે કરી છે. કારણ કે બંગાળની ખાડીમાં લો પ્રેશર બન્યું છે. જે મધ્યપ્રદેશથી પસાર થઈને ગુજરાત આવી પહોચ્યું છે. જેની સીધી અસર દક્ષિણ, મધ્ય અને ઉત્તર ગુજરાત પર જોવા મળી રહી છે.

સૌરાષ્ટ્રમાં ભારે વરસાદની આગાહી

તો બીજી તરફ અપર એર સાયક્લોનિક સર્ક્યુલેશન પણ રાજ્ય પર સક્રિય છે જેની અસર સૌરાષ્ટ્રમાં જોવા મળી રહી છે. ત્યારે હજી પણ અગામી બે દિવસ સુધી રાજ્યમાં ભારેથી અતિભારે વરસાદની આગાહી વ્યક્ત કરવામાં આવી છે. સૌરાષ્ટ્રના અનેક જિલ્લાઓમાં ભારે વરસાદ વરસી શકે છે.

મહેસાણામાં ભારે વરસાદની આગાહી

તા 10 ઓગસ્ટે સૌરાષ્ટ્ર અને કચ્છમાં તેમજ ઉત્તર ગુજરાતમાં પણ સાર્વત્રિક હળવોથી મધ્યમ-ભારે તેમજ કેટલાંક વિસ્તારોમાં અતિભારે વરસાદ પડે તેવી શક્યતા છે. મહેસાણામાં ભારેથી અતિભારે વરસાદની આગાહી કરવામાં આવી છે.

ખાસ કરીને નર્મદા, બનાસકાંઠા, પાટણ, અમદાવાદ, ગાંધીનગર, મહેસાણા, આણંદ, વડોદરા, દમણ, દાદરા નગર હવેલી, સુરત, વલસાડ, ડાંગ અને નવસારીમાં ભારે વરસાદની આગાહી કરવામાં આવી છે. 

NDRF-SDRF તૈનાત

10 ઓગસ્ટ સુધી અધિકારીઓને સતર્ક રહેવા આદેશ આપવામાં આવ્યા છે. અધિકારીઓને પોતાનું હેડક્વાટર નહીં છોડવા પણ સરકારનો આદેશ છે. રાજ્યમાં NDRF-18 અને SDRFની 11 ટીમો તૈનાત કરી દીધી છે. 

રાજકોટમાં ભારે વરસાદની આગાહી

રાજકોટમાં ભારે વરસાદની આગાહી કરવામાં આવી છે. આ આગાહીના પગલે તમામ કર્મચારીઓની રજા રદ્દ કરવામાં આવી છે. હેડ કવાર્ટર નહીં છોડવા કલેકટરે આદેશ કર્યા છે. સૌરાષ્ટ્રમાં 10 તારીખે ભારે વરસાદની આગાહી કરવામાં આવી છે.

માછીમારોને દરિયો ન ખેડવાની સૂચના

ભારે વરસાદની આગાહીને પગલે માછીમારોને દરિયો ન ખેડવાની સૂચના આપવામાં આવી છે. ત્યારે અત્યાર સુધીમાં સરેરાશ 6૭ ટકા વરસાદ રાજ્યમાં નોંધાયો છે. ત્યારે લો પ્રેશર અને અપર એર સાયક્લોનિક સર્ક્યુલેશનને કારણે અમદાવાદમાં પણ બે દિવસ ભારે વરસાદ રહેશે તેવી હવામાને આગાહી કરી છે.

છોટાઉદેપુરમાં 14 ઇંચ વરસાદ

રાજ્યમાં 154 જેટલા રસ્તાઓ પર પાણી ભરાઇ જતા બંધ કરી દેવાયા છે. જ્યારે રાજ્યના 168 તાલુકાઓમાં નોંધપાત્ર વરસાદ નોંધાયો છે. છોટાઉદેપુરના ક્વાંટમાં 14 ઇંચ જેટલો વરસાદ ખાબક્યો છે. સ્ટેટ ઇમરજન્સી ઓપરેશન દ્વારા હાલ સતત મોનિટરિંગ કરવામાં આવી રહ્યું છે.