કોફી પીવી ફાયદાકારક કે પછી નુકસાનકારક તેના પર અનેક રિસર્ચ થયા છે અને કોફી પીનારા લોકો કન્ફયુઝ થઇ જાય તેવા વિરોધાભાસી દાવાઓ થતા રહે છે.
હેલ્ધી માણસ માટે જોકે કોફી સારી કે નુકસાનકારક તે અલગ વિષય છે પરંતુ હમણા થયેલા નવા સંશોધનમાં વિજ્ઞાનીઓએ ખાસ કરીને માઇગ્રેનથી પિડાતા લોકોને વધુ કોફી ન પીવાની સલાહ આપી છે.
માઇગ્રેનના દર્દીઓ દિવસમાં ત્રણ કપ કોફી પીવે તો માથાનો દુખાવો વધી જાય છે.કોફીમાં કેફીન નામનું તત્વ હોય છે.કેફિન આરોગ્ય માટે સારું કે ખરાબ તે ડિબેટ પણ વર્ષોથી ચાલી રહી છે.જોકે અમેરિકન જર્નલ ઓફ મેડિસિનમાં પબ્લિશ થયેલા નવા સંશોધનમુજબ વધુ પડતા કેફિન અને માઇગ્રેન વચ્ચે સીધો સંબંધ છે.દિવસમાં ત્રણ કે વધુ કોફી પીનારા માઇગ્રેનના દર્દીઓને માથાનો દુખાવો તે દિવસે અથવા બીજા દિવસે એકદમ વધી જાય છે.સંશોધનમાં અનેક દર્દીઓ પરના પ્રયોગ પરથી જોકે એવું પણ તારણ નીકળ્યું હતું કે દિવસમાં એક કે બે કપ કોફી પીનારા દર્દીઓને માઇગ્રેનમાં વધારો જોવા મળ્યો ન હતો.તેથી માઇગ્રેનના દર્દીઓ જો કોફી પીવાનું છોડી ન શકે તો બે કપથી વધુ કોફી ન પીવી જોઇએ.
માઇગ્રેન માથાના દુખાવાની એવી સમસ્યા છે જેનાથી દુનિયાભરના એક અબજ જેટલા લોકો પિડાય છે.બદલાતા હવામાન,લાઇફ સ્ટાઇલ સહિતના પરિબળો પણ માઇગ્રેન પર અસર કરતા હોય છે.ખાવામાં અનિયમિતતા કે ઉંઘ પુરી ન થાય તેવા સંજોગોમાં માઇગ્રેનના દર્દીઓ વધુ દુખાવાનો અનુભવ કરે છે.એક સર્વે મુજબ દુનિયાભરમાં ચા,કોફી કે કોકો જેવા બેવરેજીસ દ્વારા દરરોજ સરેરાશ 193 મિલિગ્રામ કેફિન પેટમાં પધરાવે છે.