મોરબી / દેવળીયા ગામે ખેતમજૂરના 3 અને 5 વર્ષના દીકરાઓ ટાંકામાં ડૂબી જતા મૃત્યુ, ભાંગી પડ્યો પરિવાર

• દેવળીયા ગામે પાણીના ટાંકામાં ડૂબી જવાથી 2 બાળકોનાં મોત
• ખેત શ્રમિકોના 3 અને 5 વર્ષના દીકરાઓના મૃત્યુથી ગામમાં શોકનો માહોલ
• હાલમાં આ ઘટનાને લઇને સમગ્ર પંથકમાં ભારે અરેરાટી વ્યાપી ગઇ

આજે હળવદ પંથકમાં મોરબીના દેવળીયા ગામે પાણીના ટાંકામાં ડૂબી જવાથી બે બાળકોના મોત થયા છે. જેથી પરિવારજનમાં ભારે આક્રંદ જોવા મળી રહ્યો છે. ખેત શ્રમિકોના 3 અને 5 વર્ષના દીકરાઓના મૃત્યુથી ગામમાં પણ શોકનો માહોલ છવાઇ ગયો છે. લાંબા સમયની શોધખોળ બાદ બાળકોના મૃતદેહ મળી આવ્યા હતાં. હળવદ પોલીસે આ ઘટનાને લઇને આગળની કાર્યવાહી હાથ ધરી છે. હાલમાં આ ઘટનાને લઇને સમગ્ર પંથકમાં ભારે અરેરાટી વ્યાપી ગઇ છે.

મહેસાણાના બે ભાઇ કેનેડાના સમુદ્રમાં ડૂબતા તેમાંથી 1નું મોત નીપજ્યું

બીજી બાજુ મહેસાણાના બે ભાઇ કેનેડાના સમુદ્રમાં ડૂબતા તેમાંથી 1નું મોત નીપજ્યું છે તો આ તરફ ભાવનગરની સુકાવો નદીમાં પણ એક યુવકનું ડૂબી જવાથી મોત નીપજ્યું છે. મહેસાણાના બે ભાઇ કેનેડાના સમુદ્રમાં ડૂબ્યા હોવાની માહિતી મળી રહી છે. ઝરીન બારોટ નામનો યુવક તેના ભાઈ સાથે સમુદ્રની નજીક આવેલી ઊંચાઈ વાળી જગ્યા પર ગયા હતા, જ્યાંથી અચાનક  પગ લપસતા એક ભાઇ સમુદ્રમાં ડૂબ્યો હતો. જેને જોઇ બીજો ભાઈ પણ સમુદ્રમાં કૂદયો હતો અને બચાવવાનો પ્રયાસ કર્યો હતો. સમગ્ર ઘટનામાં ઝરીન બારોટ નામના યુવકનું સમુદ્રમાં ડૂબી જવાથી મોત નીપજ્યું છે જ્યારે બચાવવા ગયેલ ભાઇની હાલત ગંભીર છે જે હાલ હોસ્પિટલમાં સારવાર લઈ રહ્યો છે. બનાવની જાણ મહેસાણામાં રહેતા માતા-પિતાને થતાં પરિવાર શોક મગ્ન બન્યો છે. માતા-પિતા કેનેડા જવા રવાના થયા છે

ભાવનગરમાં પણ એક યુવક ડૂબ્યો

બીજી તરફ  ભાવનગરની સુકાવો નદીમાં ડૂબી જતા યુવકનું મૃત્યુ થતાં એરેરાટી વ્યાપી છે. પશુ ચરાવા ગયેલા યુવાનનું નદીમાં ડૂબી જવાથી મૃત્યુ થયું છે. બળદ યુવકને પાણીમાં ખેંચી જતા તે ડૂબવા લાગ્યો હતો. નાના ભાઈની નજર સામે જ મોટાભાઈનું મોત થયું છે. 

ઉપરોક્ત બંને ડૂબવાની ઘટનામાં એક ભાઈની સામે બીજાનું મોત થયું છે. 2 ઘટનામાં ડૂબી જવાથી મોતને ભેટલા બંને યુવકોના પરિવાર પર હાલ આફત તૂટી પડી છે. ઓચિંતી વિદાયથી સંબંધીઓ પણ શોકમગ્ન છે.