ગાંધીનગરના માણસામાં પ્રગાઢ નિદ્રામાં પોઢેલા પરપ્રાંતીય એક મજૂરને તેના સાથી મિત્રએ કુહાડીના એક જ ફટકાથી બે કટકા કરી નાખી કરપીણ હત્યા કરતા ચકચાર. હત્યારો ઝડપાયો
માણસા નજીક ઊંઘમાં જ એક મજૂરની હત્યા
પિતાની હત્યાનો બદલો લેવા બીજા મજૂરે ઢાળી દીધો
કુહાડીના એક જ ઘા એ, બીજા મજૂરના રામ રમી ગયા
ગાંધીનગરના માણસામાં પ્રગાઢ નિદ્રામાં પોઢેલા પરપ્રાંતીય એક મજૂરને તેના સાથી મિત્રએ કુહાડીના એક જ ફટકાથી બે કટકા કરી નાખી કરપીણ હત્યા કરતા ચકચાર મચી ગઈ હતી. કહેવાય છે કે, પિતાની હત્યાનો બદલો લેવા આ મજૂરે પોતાના સાથી મજૂર મિત્રનું ઢીમ ઢાળી દીધું હતું. માણસા તાલુકાના પરબતપૂરા ગામની સીમમાં આવેલા ગોકુળ કોલ્ડ સ્ટોરેજ પાસે મજૂરો રાત્રીના સમયે લાઈનબંધ સુતા હતા તે દરમિયાન એક મજૂરે બીજા મજૂરની હત્યા કરી નાખી. આ સમગ્ર ઘટના સીસીટીવી કેમરામાં કેદ થઇ હતી. મધરાતે નાસી છૂટેલો હત્યારો મજૂર પોલીસના હાથે ઝડપાઈ ગયો છે.
.
ગાંધીનગરના માણસામાં ગોકુળ કોલ્ડ સ્ટોરેજ પાસે રાત્રીના કેટલાક મજૂરો લાઈનબંધ સુતા હતા. CCTVમાં કેદ થયેલા દ્રશ્યો પ્રમાણે દરમિયાન એક મજૂર ઉઠી જઈ આમતેમ નજર ફેરવીને પોતાની ચટ્ટાઈ નીચે સંતાડેલી કુહાડી ઉઠાવી ઊંઘી રહેલા બીજા મજૂર તરફ જાય છે. કઈક આશંકાથી તે પરત પોતાની જગ્યાએ જતો રહે છે. બાદમાં તુરંત જ આ મજૂર સુતેલા મજૂર પાસે કુહાડી લઈને ગાઢ નિંદ્રામાં પોઢેલા મજૂર પર કુહાડી વડે હુમલો કરી નાસી છૂટે છે.
આ અંગે કલોલ ડી વાય એસ પી પી.ડી માણવરે જણાવ્યું હતું કે, માણસા પોલીસ મથકે આરોપી મિથુન વિરુદ્ધ IPC 302 મુજબ ખૂનનો ગુનો નોંધવામાં આવ્યો છે,મૃતક અને આરોપી બન્ને ઈસમો બિહારના વતની છે, હત્યા બાદ ફરાર આરોપી મિથુનને ઝડપવા માણસા પોલીસ દ્વારા અલગ અલગ ટિમો બનાવી રેલવે સ્ટેશન, બસ સ્ટેશન, સહિત અન્ય સ્થળે તપાસ હાથ ધરવામાં આવી હતી. જો કે આસપાસના ખેતરો ની જગ્યાઓએ તપાસ કર્યા અને CCTV ચેક કર્યા બાદ હત્યારો મિથુન ઝડપાઈ ગયો હતો