દારૂબંધી ક્યાં ? / વડોદરામાં દબાણ હટાવવા જતા 2 થેલા ભરીને મળી દેશી દારૂની પોટલીઓ, પોલીસ પણ ચોંકી ગઈ

• વડોદરામાં દેશી દારૂ મળી આવ્યો
• ગોત્રી તળાવમાં કબ્રસ્તાનની જગ્યામાંથી મળ્યો દારૂ
• પોલીસે ઘટના સ્થળે પહોંચી હાથ ધરી તપાસ 

બોટાદ લઠ્ઠાકાંડ પછી રાજ્યમાં પોલીસ એક્શન મોડમાં જોવા મળી રહી છે. મહાનગરો તથા ગામોમાંથી દેશી દારૂના અડ્ડા પર કાર્યવાહી કરવામાં આવી રહી છે.  ઠેર ઠેર દારૂની હાટડીઓ અને વેચાણ સામે આવતા પોલીસ દ્વારા ઘટના સ્થળે પહોંચીને કાયદેસરની કામગીરી કરવામાં આવી રહી છે. ત્યારે સુરત બાદ હવે વડોદરામાં દેશી દારૂના અડ્ડા ધમધમી રહ્યા હોવાનું સામે આવ્યું છે. 

ગોત્રી તળાવમાં દબાણ કરતા મળી આવ્યો દારૂ

વડોદરાના ગોત્રી તળાવમાં કબ્રસ્તાનની જગ્યામાંથી દબાણ હટાવાતા દેશી દારૂ મળી આવ્યો. બે થેલા ભરીને દેશી દારૂની પોટલીઓ મળી આવી. ખુલ્લેઆમ દારૂ વેચાઇ રહ્યુ હોવાનુ સામે આવ્યું હતું. દબાણ અધિકારીઓ અહીં કામગીરી અર્થે આવ્યા હતા પરંતુ ત્યાં દેશી દારૂ ભરેલી પોટલીઓ મળી આવી. ગોડાઉન તોડવાનુ હતું પરંતુ તે પહેલા જ દારૂની પોટલીઓ મળી આવતા પોલીસને જાણ કરવામાં આવી હતી.  વડોદરા પોલીસ દ્વારા એક તરફ દાવા કરવામાં આવે છે કે વડોદરામાં ક્યાંય દારૂનુ વેચાણ થતુ નથી ત્યારે આ ઘટનાને પગલે વડોદરા મનપાના આ દાવાની પોલ ખૂલી છે. 

અવારનવાર બુટલેગરો વિરુદ્ધ કેસ કર્યા

ઘટનાને પગલે એડિશનલ સી.પી સહિતના અધિકારીઓ ઘટના સ્થળે પહોંચ્યા હતા.  DCP ઝોન 2ના અભય સોનીએ જણાવ્યું હતુ ગોત્રી તળાવની આસપાસ અવારનવાર બુટલેગરો વિરુદ્ધ રેડ કરવામાં આવી છે તેઓ વિરુદ્ધ કાર્યવાહી કરી છે. ગોત્રી તળાવ મોટો વિસ્તાર છે. પરંતુ જે બુટલેગરો છે તેની સામે અસંખ્યવાર કેસ કરવામાં આવ્યા છે. 

દારૂ બનાવતી ફેક્ટરી ઝડપાઇ

આણંદમાં વિદેશી દારૂ બનાવતી મીની ફેક્ટરી ઝડપાઇ હતી. પોલીસે બાતમીના આધારે રેડ કરીને આંકલાવના ભેટાસી ગામેથી વિદેશી દારૂ બનાવતી ફેક્ટરી ઝડપી પાડી.આ ફેક્ટરીમાંથી દારૂ ભરવા માટેની ખાલી બોટલો,પેકિંગનો સામાન તથા કેમિકલ ભરેલા કેરબા પણ મળી આવ્યા હતા...પોલીસે આ મામલે એક આરોપીને ઝડપી પૂછપરછ હાથ ધરી છે...પૂછપરછમાં આરોપીઓના વધુ નામ સામે આવવાની શક્યતા જોવાઇ રહી છે...