કાર્યવાહી / અમદાવાદમાં કડિયા કામના બહાને સોનાના વેપારીઓની રેકી કરીને લૂંટ મચાવતી કુખ્યાત સંગાડા ગેંગ ઝડપાઇ

• અમદાવાદમાં કુખ્યાત સંગાડા ગેંગ ઝડપાઇ
• 58 હજારના ચાંદીના દાગીના કબ્જે કરાયા
• કડિયા કામના બહાને ગુનાને અંજામ આપતા 

અમદાવાદ ગ્રામ્ય વિસ્તારમાં સોના-ચાંદીની ચોરી અને લૂંટના ગુનાનો તરખાટ મચાવનાર કુખ્યાત સંગાડા ગેંગ પોલીસના હાથે ઝડપાઇ ચુકી છે. અમદાવાદમાં ઘુમા શેલા રોડ પર સોની વેપારીને વાહન પરથી નીચે પાડીને માર મારીને બંને હાથે ઈજા પહોંચાડી લુંટ ચલાવનાર ગેંગના બે આરોપીઓની LCBએ ધરપકડ કરી છે. બાતમીના આધારે અમદાવાદ ગ્રામ્ય LCB દ્વારા ગેંગના મુખ્ય સૂત્રધાર અજય સંગાડા અને કાણિયાભાઈ મેળાની ધરપકડ કરી છે.આરોપીઓ પાસેથી રૂ.58 હજારના ચાંદીના દાગીના કબ્જે કરવામાં આવ્યા છે. જેમાં બોપલમાં નોંધાયેલા ગુનાનો ભેદ પણ ઉકેલાયો છે. આરોપીઓ સોના-ચાંદીના વેપારીઓને ટાર્ગેટ કરી ગુનાને અંજામ આપતા હતા.
 
આરોપી અજય સંગાડા અને કાનીયાભાઈ મૂળ દાહોદના વતની છે. ગેંગના અન્ય સભ્યો સાથે મળી શહેરના ગ્રામ્ય વિસ્તારમાં કડિયાકામના બહાને મજૂરો સાથે રહેતા અને દિવસ દરમિયાન સોના-ચાંદીના વેપારીઓ કે જેઓ વાહન પર સોના-ચાંદીના દાગીના લઈ જતા તેઓની રેકી કરતા અને ત્યારબાદ વાહન એક્સિડેન્ટ કરી તેને મારમારી દાગીનાના લૂંટ્યા હતા. હાલ તો LCBએ બે આરોપીની ધરપકડ કરી ગેંગના અન્ય સાગરીતોને ઝડપી પાડવા કવાયત હાથ ધરી છે.