ભણવા રમવાની ઉંમરમાં વડોદરાની બે દિકરીઓએ હાંસલ કરી અનોખી સિદ્ધિ, નાની ઉંમરમાં મોટા સપના કર્યા પૂરા
13 વ્યક્તિઓ સાથે 8 વર્ષની દીકરીઓનું ટ્રેકિંગ
15હજાર ફૂટ ઊંચાઇએ આવેલી બુરાન ઘાટી કરી સર
નાની ઉંમરમાં બુરાન ઘાટી સર કરનાર દિકરીઓ વડોદરાની
કહેવાય છેને અડગ માનવીના મનને હિમાલય પણ નડતો નથી. આ ઉક્તિને સાબિત કરી બતાવી છે ત્રીજા ધોરણમાં ભણતી બે બાળકીઓએ. જી હા, વડોદરાની 8 વર્ષની બે બાળકીઓએ 15 હજાર ફિટ ઉપર આવેલી બુરાન ઘાટી સર કરવાનો રેકોર્ડ બનાવ્યો છે. શનિવારે 15 હજાર ફિટ પર રેપલિંગ કરી 7 કલાક ચાલીને ઘાટીની બીજી બાજુ મૂનરંગ ઊતરીને સૌથી નાની ઉંમરમાં આ ઘાટી સર કરવામાં પોતાનું નામ નોંધાવ્યું હતું. મહત્વનું છે કે ધોરણ 3માં ભણતુ બાળક એટલે રમવાની ઉંમર. ત્યારે આટલી નાની ઉંમરમાં મોટા મોટા રેકોર્ડ પોતાના નામે કરતી આ દિકરીઓ ખરેખર ધન્ય છે.
8 વર્ષની બે બાળકીઓએ હિમાલય સર કર્યો
વડોદરાના વાસણા રોડ પર રહેલી રાયના પટેલ અને ઇલોરાપાર્ક ખાતે રહેતી સનાયા ગાંધીએ 6 દિવસ સુધી 26કિમીનું અંતર કાપીને બુરાન ઘાટી પાસ પર પહોંચી હતી. તેઓ 11મી તારીખે 13 વ્યક્તિઓ સાથે આ બંને દિકરીઓ ટ્રેકિંગમાટે નીકળી હતી. 12મીના રોજ 9200 ફિટની ઊંચાઈએ પહોંચ્યા બાદ ત્યાંથી આગળ લીથમ ખાતે 2 દિવસ રોકાણ કર્યું હતું. જે બાદ શનિવારે વહેલી સવારે 3 વાગે ચઢાણ શરૂ કર્યું હતું. મહત્વનું છે કે ઉત્તરાખંડના કેદારકંઠા અને કાશ્મીરના તસરસ મારસર ખાતે આ બંને બાળકીઓ પર્વતારોહણ કરી ચૂકી છે. ત્યારે હવે બુરાન ઘાટી પાસ સર કરીને એક નવી સિદ્ધિ તેઓઓ પોતાના નામ કરી છે.
ટ્રેકિંગ માટે સ્પેશિયલ મંજૂરી મેળવાઈ
8 વર્ષની જ ઉંમર અને તેમાં પણ આટલી ઊંચાઇ પર જવુ કંઇ સહેલુ ન હતું. આમ તો 15 વર્ષથી ઓછી ઉંમરના બાળકોને આટલી હાઇટ પર જવાની મંજૂરી આપવામાં આવતી નથી પરંતુ ટ્રેકિંગ કંપની દ્વારા આ અંગે તેઓના વાલીઓની ખાસ મંજૂરી મેળવવામાં આવી હતી. કારણ કે આ બંને દિકરીઓ અગાઉ 13 હજાર ફીટની ઊંચાઇએ શિખરો સર કર્યા છે જેથી તેમને 15 હજાર ફીટ ઊંચાઇ પર જવાની મંજૂરી આપવામાં આવી હતી.