છેલ્લા ઘણા સમયથી દેશમાં ચાઇનીઝ વસ્તુઓનો બહિષ્કાર કરવા માટે આંદોલન કરવામાં આવી રહ્યું છે. સોશિયલ મીડિયા પર પણ લોકો ચીનની એપ કાઢવા માટે અપીલ કરી રહ્યા છે ત્યારે વધુ ટ્વીટરના કારણે વધુ એક વિવાદનો જન્મ થયો છે. અમૂલ કંપનીએ ચીની વસ્તુઓનો બહિષ્કાર કરવા અપીલ કરતું એક ટોપિકલ શેર કર્યું જે બાદ કલાકો સુધી અમૂલનું એકાઉન્ટ જ બંધ કરી દેવામાં આવ્યું છે.
અમૂલે પોતાના ઓફીશીયલ એકાઉન્ટથી શેર કર્યું હતું ટોપિકલ
ટ્વીટરે કારણ આપ્યા વગર જ એકાઉન્ટ બંધ કર્યું
ટ્વીટરે હજુ સુધી કોઈ ચોખવટ આપી નથી
કલાકો સુધી બંધ રહ્યું એકાઉન્ટ
નોંધનીય છે કે દેશમાં સૌથી મોટા દૂધ ઉત્પાદક અમૂલે ત્રીજી જૂને ચીનની વસ્તુઓનો બહિષ્કાર કરતી એક પોસ્ટ કરી હતી. અમૂલે તેના ઓફીશીયલ ટ્વિટર હેન્ડલ @Amul_Coop પર આ ટોપિકલ શેર કર્યું, જે બાદ ટ્વીટરે ચોથી જૂને આ એકાઉન્ટ જ બંધ કરી દીધું. જોકે બાદમાં અમૂલે ટ્વીટરનો સંપર્ક કર્યો તો પાંચમી જૂને ફરીથી એકાઉન્ટ એક્ટિવેટ કરવામાં આવ્યું.
અમૂલ કંપનીના મેનેજીંગ ડિરેક્ટર આર એસ સોઢીએ કહ્યું કે અમને કોઈ જ જાણકારી આપ્યા વગર જ કલાકો સુધી એકાઉન્ટ બંધ કરી દેવામાં આવ્યું હતું. અમે ટ્વીટરનો સંપર્ક કર્યો જોકે તે લોકો કોઈ જ જવાબ નથી આપી રહ્યા કે આવું કેમ કરવામાં આવ્યું.
ઘણા વર્ષોથી ટોપિકલ તૈયાર કરે છે અમૂલ
નોંધનીય છે કે અમૂલ કંપની વર્ષ 1966થી સમાચારો અને કરંટ અફેર્સના આધારે વિવિધ ટોપિકલ-પોસ્ટર બનાવતા રહ્યા છે. આ ટોપિકલ સમાચારપત્રો અને સોશિયલ મીડિયા બંને જગ્યાએ ખૂબ વાયરલ પણ થાય છે. લોકો આ ટોપિકલ ખૂબ પસંદ પણ કરે છે ત્યારે એક પોસ્ટ પછી ટ્વીટરના આવા વલણ બાદ લોકોમાં ભારે રોષ જોવા મળ્યો.
ટ્વીટર ફૂટ્યો લોકોનો ગુસ્સો
અમૂલનું ટ્વીટર એકાઉન્ટ બંધ થવાની વાત ફેલાતા જ ટ્વીટર પર જ લોકોનો ગુસ્સો ફાટી નીકળ્યો હતો. લોકોએ કહ્યું કે આ એક પક્ષપાતી વલણ છે અને તરત જ અમૂલનું એકાઉન્ટ શરુ કરવું જોઈએ. જ્યારે કેટલાક લોકોએ તો એમ પણ કહ્યું કે સરકારે પણ કાયદેસરના પગલા લેવા જોઈએ. જોકે, હજુ સુધી ટ્વિટર ઇન્ડિયા તરફથી આ અંગે કોઈ ખુલાસો કે ચોખવટ કરવામાં આવી નથી.