કોમેડિયન કપિલ શર્માનું નામ વર્લ્ડ બુક ઓફ રેકોર્ડસ લંડને ભારત અને વિદેશોમાં સૌથી વધુ દર્શકો ધરાવનાર સ્ટેન્ડઅપ કોમેડિયન તરીકે નોંધ્યું છે.
આ વાતની જાણકારી સોની ટીવીના ઓફિશિયલ એકાઉન્ટમાંથી મળી છે. ચેનલે સર્ટિફિકેટ શેર કરીને લખ્યું છે કે, ''અમારા બધા માટે આ ગર્વની ક્ષણ છે. વર્લ્ડ બુક ઓફ રેકોર્ડ દ્વારા ભારત અને વિદેશમાં સૌથી વધુ જોવાનાર કોમેડિયન અને એનિમલ રાઇટસને પ્રમોટ કરવા માટે સન્માનિત કરાતાં અમે કોમેડી કિંગ કપિલ શર્માને શુભેચ્છાઓ આપીએ છીએ.''
38 વર્ષીય કપિલ શર્માએ સ્ટેન્ડઅપ કોમેડિયન તરીકે ઘણા શોમાં કામ કર્યું છે. તેને અસલી ઓળખ કોમેડી નાઇટસ વિથ કપિલથી મળી હતી. 2013માં શરૂ થયેલો આ શો 2016 સુધી ચાલ્યો, ત્યાર બાદ તે કપિલ શર્મા શો, ફેમિલી ટાઇમ વીથ કપિલ શર્મા હોસ્ટ કરી ચૂકયો છે. હાલ તે ધ કપિલ શર્મા શોની બીજી સિઝનમાં જોવા મળશે.
કપિલનો શો આજે બોલિવૂડ સેલિબ્રિટીઝના પ્રમોશનનો સૌથી શ્રેષ્ઠ વિકલ્પ માનવામાં આવે છે. એક સમય હતો જ્યારે આ શો પર આવવા કોઇ સ્ટાર તૈયાર થતા ન હતા ત્યારે વીતેલા જમાનાનો સુપરસ્ટાર ધર્મેન્દ્ર તેનો પહેલો મહેમાન બન્યો હતો. આ વાતનો ખુલાસો કપિલ શર્માએ તાજેતરમાં એક ઇન્ટરવ્યૂ દરમિયાન કર્યો હતો. કપિલ શર્માએ કહ્યું હતું કે, ''આમ તો મારા બધા જ ગેસ્ટ સપોર્ટિવ રહ્યા અને બધાની સાથે ખૂબ જ મજા આવી, પરંતુ એક એવી વ્યકિત છે જેને ખૂબ જ માનું છું અને તે છે ધરમ પાજી. જ્યારે તેઓ કોમેડી નાઇટસના મહેમાન બન્યા ત્યાર પછી મારા શોને ખૂબ જ પ્રશંસા મળી અને બધા સ્ટારે આવવાનું શરૂ કર્યું.''