કૌભાંડ / ખાતર અને તુવેર કાંડ મામલે કોંગ્રેસના ધારાસભ્યોની પત્રકાર પરિષદ

કોંગ્રેસના ધારાસભ્ય પાલ આંબલિયાએ જણાવ્યું કે, હજુ સુધી ખાતરની બોરીઓમાંથી સેમ્પલ લેવાયા નથી અને GNFC અધિકારીઓ તોલમાપના કર્મચારીઓ સાથે રાખતા નથી. અધુરી માહિતી જાહેર કરીને સરકારે કૌભાંડ પર ઢાંકપિછોડો કર્યો છે, એક વર્ષમાં 200 કરોડનો ભ્રષ્ટાચાર કર્યો છે. ટ્રકનો અને બોરીના વજનની સરખામણી ન કરી આ બાબતે સરકાર અને GSFCના અધિકારીઓને જાણ હતી. આ ભુલ સરકારના ઉપરી અધિકારીઓની છે. GSFC કેટલા વિતરણ કેન્દ્રો હતા તેની માહિતી પણ નથી આપી. વર્ષોથી એક પણ વિતરણ કેન્દ્ર પર વજન કાંટો ન હતો. તોલમાપ અધિકારીઓના વજન કાંટાને લઈને કેમ કાર્યવાહી ન કરી? અને હજુ સુધી કોઈને પકડવામાં જ નથી આવ્યા.

આ મામલે લલિત વસોયાએ જણાવ્યું કે, GSFCએ ઓછા વજનનુ જાહેરમાં સ્વીકાર્યુ છે અને કોંભાડમાં GSFC સીધી રીતે સંડોવાયેલી છે. ધોરાજી ઉપલેટા આપવામાં આવેલા ખાતારમાં 700 ગ્રામ ઓછું વજન હતુ. 

જ્યારે લલિત કગથરાએ જણાવ્યું કે, GSFCના અધિકારી પર બીજો કેસ થવો જોઈએ. તોલમાપમાં ઓછુ દેવુ તે ફોજદારી કેસ બને છે. અધિકારીઓ પર ક્રિમિનલ પ્રોસિજર થવી જોઈએ. અધિકારીઓ સામે કાર્યવાહી નહી થાય ત્યા સુધી લડત ચાલુ રહેશે. સરકારના માણસો જ કૌભાંડો કરે છે. મગફળી કૌભાંડમાં પણ ભાજપના કાર્યકર્તાઓ સામેલ છે.

તો આ મામલે રિબડિયાએ જણાવ્યું કે, તપાસનુ ફિંડલુ વાળી દેવામાં આવે છે, આ કૌભાંડ પણ તુવેર જેવુ જ છે. ભેજ હોય તો ખાતરનુ વજન વધે છે ઘટે નહીં. સીએમ કહે છે કે, ચમરબંધીને છોડશુ નહી, હજુ ખોળનુ કૌભાંડ બહાર આવવાનુ છે. સરકારે એકવાર દાખલો બેસાડવો જોઈએ, ગાયોને ખવડાવવાના ખોળમાં પૂંઠા ભેળવવામાં આવે છે.

જ્યારે પ્રેસ કોન્ફરન્સ બાદ હવે કોંગ્રેસના નેતાઓની ગાંધીનગરમાં સચિવાલયમાં વિપક્ષના નેતા પરેશ ધાનાણીની ઓફિસમાં બેઠક મળી છે. પરેશ ધાનાણી અને કોંગ્રેસના ધારાસભ્ય લલિત કગથરા, લલિત વસોયા, હર્ષદ રિબડીયા અને પાલ આંબલિયાની બેઠક મળી છે. પાક વીમો, તુવેરકાંડ અને ખાતર કૌભાંડને લઈને આ બેઠકમાં કોંગ્રેસ દ્વારા રણનીતિ ઘડવામાં આવશે. આ મામલે કોંગ્રેસ દ્વારા આગામી દિવસોમાં કાર્યક્રમ પણ આપવામા આવશે.