અસાધારણ ઘટના / ખરે ટાણે કામ લાગ્યું WhatsApp, તુર્કીમાં બિલ્ડિંગ નીચે દબાયેલા 3 લોકોના બચાવ્યાં જીવ, આવી બની ઘટના

• સંકટ સમયમાં વોટ્સએપ કામે લાગ્યું
• તુર્કી ભૂકંપમાં 3 લોકોનો જીવ બચાવ્યો
• કાટમાળમાં દબાયેલા યુવાને વીડિયો બનાવીને વોટસ્એપ પર મૂક્યો
• મિત્રે સ્ટેટસ જોઈને બચાવકર્મીઓને કરી વાત

એપલ વોચ દ્વારા જીવ બચાવવાના સમાચાર આપણે સતત વાંચતા-સાંભળતા રહીએ છીએ, પરંતુ આજે આપણે જે એપની વાત કરી રહ્યા છીએ તે વોટ્સએપ છે. તુર્કીમાં આવેલા ભૂકંપના કારણે કાટમાળ નીચે દબાયેલા 20 વર્ષના એક યુવકે વોટ્સએપથી પોતાનો અને પોતાના પરિવારના બે સભ્યોનો જીવ બચાવી લીધો હતો.

વોટ્સએપ સ્ટેટસ મૂકીને મદદ માગી 
ગયા અઠવાડિયે સોમવારે બપોરે જ્યારે બીજો ભૂકંપ આવ્યો હતો ત્યારે બોરન કુબાત નામનો આ વિદ્યાર્થી મલાતિયામાં પોતાના સંબંધીઓને મળવા ગયો હતો. ત્યારે ભૂકંપ ત્રાટક્યો હતો અને તે પોતાના સંબંધીઓ સાથે એક એપાર્ટમેન્ટ બ્લોકના કાટમાળ નીચે ફસાઈ ગયો હતો તેમ છતાં પણ તે હિંમત હાર્યો નહોતો. તેની પાસે એક મોબાઈલ હતો અને તેણે કાટમાળની નીચે રહીને મોબાઈલ દ્વારા એક વીડિયો બનાવ્યો હતો અને સ્ટેટસ પર એક વીડિયો શેર કર્યો હતો અને તેના લોકેશન વિશે માહિતી આપીને મદદ માંગી હતી.

વોટ્સએપ સ્ટેટસને આધારે યુવાનનો જીવ બચાવાયો 
વીડિયોમાં, કુબતે તુર્કી ભાષામાં એક સંદેશ શેર કર્યો હતો જેમાં કહેવામાં આવ્યું હતું કે જે કોઈ પણ આ વોટ્સએપ સ્ટેટસ જોઈ રહ્યું છે તે કૃપા કરીને અમને મદદ કરે અને બચાવે. કુબતે આપેલી માહિતીને પગલે બચાવકર્મીઓએ પરિવારને બચાવવામાં સફળતા મેળવી હતી અને કુબત અને તેની માતા અને કાકાને કાટમાળમાંથી બહાર કાઢ્યા હતા. 

પીડિતે યુવાને આપી જાણકારી 
કાટમાળમાંથી હેમખેમ બહાર આવ્યાં બાદ કુબતે કહ્યું કે તેની પાસે એક ફોન હતો તેથી તેણે વિચાર્યું કે જો તે સોશિયલ મીડિયા પર કોઈ વીડિયો શેર કરે છે, તો તેના મિત્રો તેને જોઈ શકે છે અને તેઓ તેની પાસે પહોંચી શકે છે. જેથી તેણે આ વીડિયો વોટ્સએપ પર શેર કરીને લોકોની મદદ માંગી હતી.