રેસિપી / નાસ્તામાં કંઈક નવું ટ્રાય કરવાનો પ્લાન છે તો ઉતારો આ ગરમાગરમ સ્વાદિષ્ટ ભજિયા, જાણો રેસિપિ

અત્યારે બજારમાં લીલાછમ તાજા શાકભાજી આવવાના ચાલુ થઈ ગયા છે. આમ તો પાલક બારેમાસ મળતા થઈ ગયા છે, પરંતુ શિયાળામાં પાલક વધારે સારી ક્વોલિટીની મળે છે. એવામાં પાલકના શાક સિવાય પણ તમે ઘણી બધી ચટાકેદાર વાનગી ચાખી શકો છો. પાલકનું સેવન શિયાળામાં કરવાના ઘણા ફાયદા તો છે જ. પરંતુ આપણે તેના ચટકારા વિશે વાત કરીએ તો આજે અમે તમારી માટે પાલકના ભજિયાની રેસિપી લાવ્યા છીએ. કોઈ પણ સમયે હેલ્ધી નાસ્તા માટે આ ભજિયા બેસ્ટ રહેશે. તો જાણો રેસિપિ અને કરી લો ટ્રાય.

પાલક ભજિયાં

સામગ્રી

-1 ઝૂડી પાલકની ભાજી

ખીરું માટે

-1/2 કપ ચણાનો લોટ
-1/2 ટી સ્પૂન હળદર
-1 ટી સ્પૂન લાલ મરચાંની ભૂકી
-1/2 ટી સ્પૂન ધાણાજીરું 
-1 ટી સ્પૂન આદું-લસણની પેસ્ટ
-1/4 ટી સ્પૂન બેકિંગ સોડા
-પાણી જરૂર મુજબ
-મીઠું સ્વાદાનુસાર
-તેલ તળવા માટે 

રીત

સૌપ્રથમ પાલકની ભાજી સાફ કરી એનાં ફક્ત પાન લઈ લો. પાન સારી રીતે સૂકાં કરી દેવાં. ખાસ ધ્યાન રાખજો કે પાન એકદમ સૂકાં હોવાં જોઈએ નહીં તો ભીનાં પાનને લીધે ભજિયાં ક્રિસ્પી નહીં લાગે. લાંબાં ભજિયાં ગમતાં હોય તો પાનને આખાં જ રાખો. નાનાં ભજિયાં માટે પાનનાં બે કે ત્રણ ટુકડા કરો. હવે એક બાઉલમાં ખીરું બનાવવા માટેની બધી સામગ્રી ભેગી કરો. ધીમે-ધીમે પાણી ઉમેરતા જઈ જાડી પેસ્ટ તૈયાર કરો. આખેઆખાં પાલકનાં પાન પર ખીરાનું કોટિંગ થઈ શકે એટલું જાડું ખીરું હોવું જરૂરી છે. તૈયાર થયેલા ખીરાને ૧૫ મિનિટ માટે સાઇડ પર મૂકી દો. તેલને ફાસ્ટ તાપે ગરમ કરવા મૂકો. પાલકનાં પાનને ખીરાની અંદર આખું બોળી ગરમ થયેલા તેલમાં તળવા મૂકો. તાપ ધીમો કરો. બન્ને સાઇડથી સરખાં તળાય એટલે બહાર કાઢી ટૉમેટો સૉસ અને કોથમીરની ચટણી સાથે ગરમ- ગરમ સર્વ કરો.