રેસિપી / શિયાળામાં પ્લાન કરો આ આયર્નસભર બ્રેકફાસ્ટ, હેલ્થ રેહશે ટનાટન

સામગ્રી

-1 કપ ચણાનો લોટ
-300 ગ્રામ પાલક
-1/4 કપ જાડું દહીં
-1 ઇંચનો ટુકડો આદુંનો
-2 થી 3 નંગ લીલાં મરચાં
-2 ચમચા તેલ
-1 ચમચી લીંબુનો રસ
-1 ચમચો ખાંડ
-1 નાની ચમચી ખાવાનો સોડા
-1 ચમચો ઝીણી સમારેલી કોથમીર 
-મીઠું સ્વાદાનુસાર

વઘાર માટે

-2 ચમચા તેલ
-1 ચમચી રાઈ
-2 ચમચી તલ
-5 થી 6 મીઠા લીમડાનાં પાન
-1/4 ચમચી હિંગ
-3 ચમચા પાણી

રીત

સૌપ્રથમ પાલકનાં પાનને દાંડી સાથે જ વરાળે બાફી લો. ઠંડા થાય એટલે એમાં આદું અને મરચાં ઉમેરી મિક્સમાં પ્યુરી બનાવી લો અને અલગ રાખો. હવે એક બાઉલમાં ચણાનો લોટ, પાલકની પ્યુરી, દહીં અને તેલ લઈ મિક્સ કરો. જરૂર પડે તો થોડું પાણી ઉમેરી ખીરું બનાવી લો. ખીરું ખૂબ પાતળું પણ નહીં અને ખૂબ ઘટ્ટ પણ નહીં એવું હોવું જોઈએ. હવે ખીરામાં મીઠું, લીંબુનો રસ, સાકર ઉમેરી મિક્સ કરો અને પાંચથી ૧૦ મિનિટ માટે સેટ થવા દો. હવે સોડા ઉમેરી હલાવો અને તેલ લગાવેલી થાળીમાં પાથરો. ઢોકળાંને ૧૫થી ૨૦ મિનિટ માટે વરાળે બાફી લો. ઢોકળાં બફાઈ જાય એટલે ગૅસ પરથી ઉતારી ઠંડાં કરો. હવે વઘાર કરવા માટે એક પૅનમાં તેલ ગરમ કરી એમાં રાઈ, તલ અને મીઠા લીમડાનાં પાન ઉમેરી ગરમ કરો. તલ અને રાઈ ફૂટે એટલે ગૅસ બંધ કરી વઘારમાં ત્રણ ચમચા પાણી ઉમેરો. તૈયાર કરેલો વઘાર ઢોકળાં પર પાથરી દો. ઢોકળાંને ચોરસ ટુકડામાં કાપી એના પર કોથમીર ભભરાવી સજાવો. સર્વિંગ પ્લેટમાં કાઢી ચટણી સાથે સર્વ કરો.