કોરોના વાયરસ, લૉકડાઉન અને ઉપરથી ઉનાળાની કાળઝાળ ગરમીથી તમે સૌ પરેશાન છો તે સ્વાભાવિક છે. આ સમયે તમે ઘરે બેઠાં ગરમીથી રાહત મેળવી શકો તે માટે તમે કાચી કેરીનો પન્નો એટલે કે બાફલો બનાવી શકો છો. આ બાફલો બનાવવાનું ખૂબ જ સરળ છે. કાચી કેરીની સાથે ઘરની કેટલીક ચીજો મિક્સ કરીને તમે ફટાફટ તેને બનાવી શકો છો અને ગરમીથી રાહત મેળવી શકો છો. તો કરી લો લૉકડાઉનમાં ગરમીનો પારો ડાઉન કરવાની આ ખાસ રેસિપીની તૈયારી.
કેરીનો પન્નો ( બાફલો )
સામગ્રી
7 મધ્યમ સાઈઝની કાચી કેરી
પોણો કપ પાણી
2 ટી સ્પૂન શેકીને પાવડર કરેલું જીરુ
1 ટી સ્પૂન લાલ મરચાનો પાવડર
દોઢ ટી સ્પૂન મીઠું
5 ટેબલ સ્પૂન ઝીણો સમારેલો ફૂદીનો
ક્રશ કરેલા આઈસ ક્યૂબ
ઠંડું પાણી
ખાંડ સ્વાદાનુસાર
રીત
સૌપ્રથમ કાચી કેરીને છોલી લો અને તેના કટકા કરીને ગરમ પાણીમાં બાફી લો. દસ મિનિટ સુધી ઉકળવા દો. હવે કેરી ચઢી જાય એટલે તેને ઠંડી થવા દો. એક અન્ય વાસણમાં જરૂર પ્રમાણેની ખાંડ, મીઠું, મરી પાવડર, સંચળ પાવડર અને જીરૂ પાવડર ઉમેરો. તેને સ્મૂધ થાય ત્યા સુધી ફેંટી લો. હવે તેમાં ઝીણો સમારેલો ફૂદીનો ઉમેરો અને ફરીથી મિક્સ કરો. હવે તેમાં કાચી કેરીને ક્રશ કરીને મિક્સ કરો. તૈયાર થયેલા આમ પન્નાને એક જગમાં ભરી લો. હવે જ્યારે ઈચ્છા થાય ત્યારે તેમાં ઠંડું પાણી અને આઈસ ક્યૂબ મિકસ કરીને તેની મજા માણો. તેનાથી ગરમી સામે રક્ષણ મળશે.