રેસિપી / વધેલા ભાતને આપો નવો ટ્વિસ્ટ અને બનાવો આ ખાસ વાનગી, નહીં ભૂલાય સ્વાદ

હવેથી ઘરમાં ભાત વધી જાયો તો તેને વઘારીને ખાવાના બદલે તમે આ સિમ્પલ અને અલગ મૂઠિયાની રેસિપી ટ્રાય કરી શકો છો. આ મૂઠિયા સ્વાદમાં ટેસ્ટી અને હેલ્ધી હોવાથી નાના મોટા સૌને માટે સારા રહે છે. તેનો ટેસ્ટ પણ સામાન્ય મૂઠિયા જેવો હોવાના કારણે ઘરના દરેક લોકો આ ડિશને પસંદ કરે છે. આ મૂઠિયા નાસ્તા માટે બેસ્ટ ઓપ્શન બની શકે છે. તમે તેને ચાની સાથે સર્વ કરશો તો તેની મજા વધી જશે. 

ભાતના મૂઠિયા

સામગ્રી

-ચાર કપ ભાત
-અડધી ટીસ્પૂન લાલ મરચું પાવડર
-અડધી ટીસ્પૂન હળદર
-એક ટીસ્પૂન ધાણા પાવડર
-ત્રણ ટીસ્પૂન ખાંડ
-એક ટીસ્પૂન આદુની પેસ્ટ
-એક ટીસ્પૂન લસણની પેસ્ટ
-એક ટીસ્પૂન તેલ
-અડધો કપ દહીં
-પોણો કપ હાંડવાનો લોટ

વઘાર માટે

-એક ટીસ્પૂન રાઈ
-એક ટીસ્પૂન તલ
-એક નંગ સૂકું લાલ મરચું
-એક ચપટી હિંગ

રીત

સૌપ્રથમ એક બાઉલમાં બધા જ મસાલા ભેગા કરો. હવે તેમાં દહીં નાંખીને બરાબર મિક્સ કરો. ત્યારબાદ તેમાં ધીમે-ધીમે હાંડવાનો લોટ નાંખતા જઈને કણક બાંધી લો. ત્યારબાદ તેમાંથી મૂઠિયા વળી લો. હવે મૂઠિયાને કૂકરમાં બાફવા માટે મૂકો. બફાઈ જાય એટલે તેને ઠંડા કરીને કટ કરી લો. ત્યારબાદ વઘારની તૈયારી કરો. સૌપ્રથમ વઘારિયામાં તેલ ગરમ કરવા માટે મૂકો. તેલ ગરમ થાય એટલે તેમાં રાઈ અને તલ ઉમેરો. રાઈ ફૂટે એટલે તેમાં હિંગ અને મીઠો લીમડો નાંખીને અડધી મિનિટ માટે સાંતળો. હવે તેમાં મૂઠિયા નાંખીને થોડીવાર માટે સાંતળીને ગેસ બંધ કરો. છેલ્લે ચટણી સાથે સર્વ કરો.