રેસિપી / નાસ્તા માટે પરફેક્ટ છે આ ગરમાગરમ આયર્નથી ભરપૂર મૂઠિયા, જાણો સિમ્પલ રેસિપી

પાલકના મૂઠિયા

સામગ્રી

-1/4 કપ ઘઉંનો લોટ
-1/2 કપ ચણાનો લોટ
-1/2 કપ રવો
-1 કપ મકાઈનો લોટ
-1/2 ટી સ્પૂન હળદર
-2 કપ પાલક સમારેલી
-1/4 ટી સ્પૂન હિંગ
-1/4 ટી સ્પૂન બેકિંગ સોડા
-1/2 ટી સ્પૂન જીરૂં
-1/2 ટી સ્પૂન વરિયાળી
-1 ટી સ્પૂન ખાંડ
-1 ટી સ્પૂન લસણની પેસ્ટ
-1 ટેબલ સ્પૂન આદુંની પેસ્ટ
-1 ટેબલ સ્પૂન દહીં
-4 નંગ લીલાં મરચાં સમારેલા
-2 ટેબલ સ્પૂન કોથમીર
-1 ટી સ્પૂન લીંબુનો રસ
-1 ટી સ્પૂન તેલ
-મીઠું સ્વાદનુસાર

વઘાર માટે

-3 ટી સ્પૂન તેલ
-1/2 ટી સ્પૂન રાઈ
-2 ટી સ્પૂન તલ

રીત

એક બાઉલમાં ઘઉંનો લોટ, ચણાનો લોટ, રવો, મકાઈનો લોટ, હળદર, હિંગ, બેકિંગ સોડા, જીરૂં, વરિયાળી, ખાંડ અને મીઠું ઉમેરીને બરાબર મિક્સ કરી લો. ત્યાર બાદ તેમાં આદુંની પેસ્ટ, લીલા મરચાં, કોથમીર, લીંબુનો રસ અને તેલ નાખીને ફરીથી બરાબર મિક્સ કરી લો. હવે તેમાં સાફ કરીને સમારીને નીતારેલી પાલક નાખો. છેલ્લે દહીં નાખીને બરાબર મિક્સ કરીને કણક બાંધી લો. જો જરૂર પડે તો જ થોડું પાણી ઉમેરો. લોટને ઢાંકીને થોડી વાર મૂકી રાખો. હવે લોટમાંથી મૂઠિયા વાળી લો. ત્યાં સુધીમાં કૂકરમાં પાણી ગરમ કરવા માટે મૂકો. પાણી ગરમ થાય એટલે તેમાં મૂઠિયાની પ્લેટ મૂકો. મૂઠિયાને લગભગ વીસથી ત્રીસ મિનિટ સુધી બાફી લો. હવે મૂઠિયાને બહાર કાઢીને ઠંડા થવા દો. ઠંડા થાય એટલે તેના કટકા કરી લો. હવે એક પેનમાં તેલ ગરમ કરવા માટે મૂકો. તેલ ગરમ થાય એટલે તેમાં રાઈ અને તલનો વઘાર કરો. રાઈ અને તલ ફૂટે એટલે તેમાં મૂઠિયા નાખીને બરાબર મિક્સ કરી લો. ગરમા-ગરમ મૂઠિયાને ચટણી અથવા દહીં સાથે સર્વ કરો.