રેસિપી / એનીમીક બાળકો અને મોટેરાઓ માટે બેસ્ટ છે આ સીઝનલ શાક, જાણો સરળ રેસિપી

સામાન્ય રીતે સ્ત્રીઓમાં આર્યનની ઊણપ હંમેશા જોવા મળતી હોય છે. હવે તો બાળકોમાં પણ હિમોગ્લોબીન ઓછું હોય તેવું ડોક્ટર કહેતા હોય છે. એવા સમયે આ પ્રકારની આર્યન રીચ વાનગીઓને ચોક્કસથી તમારે તમારા ડાયેટમાં સામેલ કરવી જોઈએ. 

મૂંગ દાલ પાલક
 
સામગ્રી
 
-સો ગ્રામ મગની દાળ
-પાંચસો ગ્રામ પાલક
-ત્રણ નંગ ટામેટા
-બે નંગ લીલા મરચાં
-એક ઈંચનો આદુંનો ટુકડો
-બે ટીસ્પૂન ઘી
-બે ચપટી હિંગ
-અડધી ટીસ્પૂન જીરૂં
-પા ટીસ્પૂન હળદર
-પા ટીસ્પૂન લાલ મરચું પાવડર
-બે ટીસ્પૂન કોથમીર સમારેલી
-મીઠું સ્વાદ અનુસાર

 
રીત
 
સૌપ્રથમ મગની દાળને ધોઈને અડધા કલાક માટે પલાળી દો. પાલકને સારી રીતે ધોઈને નીતારી લો. પાણી નીતરી જાય એટલે તેને સમારી લો. ત્યારબાદ એક મિક્સર જારમાં ટામેટા, લીલા મરચાં અને આદુંને ગ્રાઈન્ડ કરીને પેસ્ટ બનાવી લો. હવે એક કૂકરમાં ઘી ગરમ કરો. ગરમ થાય એઠલે તેમાં જીરૂં ઉમેરો. જીરૂં લાલ થાય એટલે તેમાં હિંગ ઉમેરીને થોડીક સેકન્ડ માટે સાંતળો. ત્યારબાદ તેમાં હળદર, લાલ મરચું પાવડર અને આદુ-મરચાંવાળી પેસ્ટ ઉમેરીને સાંતળો. એકાદ મિનિટ સાંતળ્યા બાદ હવે તેમાં મગની દાળ અને સમારેલી પાલક ઉમેરીને બેથી ત્રણ મિનિટ માટે સાંતળો. ત્યાર બાદ તેમાં બેથી અઢી કપ પાણી અને સ્વાદ અનુસાર મીઠું ઉમેરીને બરાબર મિક્સ કરી લો. ત્યારબાદ કૂકરનું ઢાંકણ બંધ કરી દો. હવે એકથી બે સીટી વગાડી લો. મૂંગ દાલ પાલક તૈયાર છે. કૂકર ઠંડું થાય એટલે તેન સર્વિંગ બાઉલમાં કાઢી લો. હવે તેને થોડા ગરમ ઘી અને ફ્રેશ મલાઈથી ગાર્નિશ કરીને ગરમા-ગરમ સર્વ કરો.