રોજ શું શાક બનાવવું એ એક પ્રશ્ન દરેક ઘરમાં જોવા મળે છે. ભાજીના શાક ક્યારેક બાળકોને પસંદ આવતા હોતા નથી. આજે અહીં બાળકોની પસંદના ભીંડાના શાકમાં પણ વૈવિધ્ય લાવવાનો પ્રયાસ કરવામાં આવ્યો છે. આજે અહીં આપને માટે પરિવારને પસંદ આવે તેવા મસાલા ભીડીંના શાકની રેસિપિ લાવવામાં આવી છે. જેને બાળકોની સાથે મોટેરાંઓ પણ હોંશેહોંશે ખાઇ લેતા હોય છે.
ભીંડા ધોઈ કોરા કરી તેની નાની પાતળી ચીરી કરવી. ચણાનો લોટ, શિંગદાણા, તેલ, લાલ મરચું, ધાણા પાવડર, ગરમ મસાલો, હળદર, ખાંડ અને મીઠું મિક્સ કરી મસાલો તૈયાર કરવો. એક તપેલીમાં બે ટીસ્પૂન તેલ લઈ ગરમ થાય એટલે તેમાં રાઈ-જીરું, હિંગ અને લસણ નાંખી ભીંડા વઘારવા. તેમાં હળદર, થોડું લાલ મરચું અને મીઠું નાંખી, ધીમા તાપે ભીંડા ચડવવા. ભીંડા બરાબર ચડી જાય અને તેમાંથી તેલ છુટું પડે એટલે તેમાં તૈયાર કરેલો મસાલો મિક્સ કરી ધીમા તાપે ૭-૮ મિનિટ રાખવું. બેસન શેકાઈ જાય પછી નીચે ઉતારી લીલા ધાણા નાંખી ગરમા-ગરમ પીરસવું.