દાળ ઢોકળી નામ સાંભળતા જ મોંમાંથી પાણી છુટી જાય, ખરૂં ને? આજે અમે તમારી માટે આ જ દાળ ઢોકળીને નવા રૂપ, રંગ અને સ્વાદ સાથે લઈને આવ્યા છીએ. સામાન્ય રીતે ગુજરાતી ઘરોમાં જ્યારે રજા હોય ત્યારે અને ખાસ કરીને ઠંડીની સીઝનમાં પણ ગરમા-ગરમ દાળ ઢોકળી બનાવી દેવામાં આવતી હોય છે. તો હવે બનાવો લીલવાની દાળ ઢોકળી.
સરળ અને સ્વાદિષ્ટ વાનગી. આપણને ખુબ ભાવતી પણ હોય છે. પરંતુ આજ દાળ ઢોકળીને જો તમે ટ્વિસ્ટ સાથે સર્વ કરશો તો ચોક્કસથી પરિવારજનો બે હાથે ખાશે. તો આજે ટ્રાય કરી લો બજારમાં મળતા લીલવાની દાળ ઢોકળી. સરળ રીતે અને ઝડપથી બની જશે આ ગુજરાતી વાનગી.
સૌપ્રથમ એક તપેલીમાં પાણી, સોડા અને તેલ નાંખી ગેસ પર ગરમ કરવા માટે મૂકો. ગરમ થાય એટલે તેમાં લીલવા ઉમેરો. લીલવા બફાઈ જાય એટલે તેમાં મીઠું, હળદર, મરચુ અને ગરમ પાણી ઉમેરો. તે ઉકળે એ દરમિયાન ઘઉંના લોટમાં મીઠું, મરચું, હળદર અને તેલનું મણ ઉમેરી કણક બાંધી લો. આ લોટને થોડીવાર માટે ઢાંકીને મૂકી રાખો. બાદમાં તેમાંથી મોટો લુઓ લઈને રોટલો વણી લો. તેના ચપ્પાથી કટકા કરી લો. આદુ, મરચાં, તલ, ખાંડ, ગરમ મસાલો, ધાણાજીરું અને કોપરાનું છીણને પાણીમાં ઉમેરો. હવે તેમાં ઢોકળી ઉમેરો અને રસો જાડો થાય ત્યાં સુધી ચઢવા દો. બાદમાં તેને ગેસ પરથી ઉતારી લો. કોથમીર અને કોપરાથી ગાર્નિશ કરીને ગરમા-ગરમ સર્વ કરો.