રેસિપી / ગુજરાતી ખમણને આપો ટ્વિસ્ટ, બનાવો સુરતી રસાવાળા ખમણ ઢોકળાથી મળશે અનેરો સ્વાદ

સુરતી રસાવાળા ખમણ ઢોકળા

સામગ્રી

ખમણ માટે

-800 ગ્રામ ચણા દાણ
-1 ટી સ્પૂન હળદર
-7 થી 9 લીલા મરચાં સમારેલાં
-2 ટેબલ સ્પૂન આદુંની પેસ્ટ
-2 ચપટી હિંગ
-2 ટેબલ સ્પૂન સિંગતેલ
-2 ટેબલ સ્પૂન ઈનો
-મીઠું સ્વાદાનુસાર

વઘાર માટે

-4 ટેબલ સ્પૂન સિંગતેલ
-4 ટી સ્પૂન રાઈ
-2 ટેબલ સ્પૂન નારિયેળનું ખમણ
-2 ટેબલ સ્પૂન કોથમીર

રસા માટે

-200 ગ્રામ અડદની દાળ
-200 ગ્રામ ચણાની દાળ
-200 ગ્રામ તુવેરની દાળ
-8 થી 9 નંગ ટામેટાં સમારેલા
-4 થી 5 નંગ એલચી
-3 થી 4 નંગ લવિંગ
-6 થી 7 નંગ કાળા મરી
-2 થી 3 નંગ લીલા મરચાં
-3 થી 4 નંગ આંબલી પલાળેલી
-મીઠું સ્વાદાનુસાર

અન્ય સામગ્રી

-4 નંગ ટામેટાં સમારેલાં
-2 નંગ ડુંગળી સમારેલી
-2 કપ ઝીણી સેવ
-4 ટેબલ સ્પૂન કોથમીર સમારેલી
-4 ટેબલ સ્પૂન નારિયેળનું ખમણ

રીત

સૌપ્રથમ ચણાની દાળને ચારથી પાંચ કલાક માટે પલાળી રાખો. ત્યાર બાદ તેમાંથી વધારાનું પાણી નીતારીને તેને વાટીને પેસ્ટ બનાવી લો. આ પેસ્ટને ચારથી પાંચ કલાક માટે ઢાંકીને મૂકી રાખો. ત્યાર બાદ તેમાં ઈનો સિવાયની બાકીની બધી જ સામગ્રી ઉમેરીને બરાબર મિક્સ કરી લો. છેલ્લે જ્યારે ખમણ ઉતારવાના હોય તેની થોડી વાર પહેલા તેમાં ઈનો નાખીને બરાબર મિક્ષ કરી લો. હવે એક થાળીમાં તેલ લગાવીને તૈયાર કરેલું મિશ્રણ ઉમેરી દો. ઢોકળિયામાં પાણી ગરમ કરીને ખમણ બાફીને ઉતારી લો. હવે એક ફ્રાઈંગ પેન લો. તેમાં તેલ ગરમ કરો. જ્યારે તેલ ગરમ થઈ જાય ત્યારે રાઈ, હિંગ, લીમડો અને લીલા મરચાનો વધાર કરો. આ મસાલો તડતડે એટલે તેમાં ઢોકળા નાંખી દો. છેલ્લે ખમણ પર થોડું નારિયેળનું ખમણ નાખો. 

હવે રસા માટે બંને દાળને બે કલાક માટે પલાળી દો. ત્યાર બાદ તેને બાફી લો. હવે બીજા એક પેનમાં પાણી ગરમ કરો. પાણી ઉકળે એટલે તેમાં ટામેટાં બાફી લો. હવે બાફેલી દાળને વલોવી લો. હવે એલચી, લવિંગ અને કાણા મરીના ખાંડીને પાવડર બનાવી લો. હવે બાફેલી દાળને ટામેટાવાળા ઉકળતા પાણીમાં નાખીને બરાબર મિક્ષ કરી લો. ત્યાર બાદ તેમાં લીલા મરચાંની પેસ્ટ, ગરમ મસાલાનો પાવડર અને મીઠું નાખીને બરાબર મિક્ષ કરો. હવે આ દાળને થોડીવાર માટે ઉકળવા દો. હવે તેમાં છેલ્લે આંબલીનો પલ્પ નાખીને બરાબર મિક્સ કરી લો. દાળને ઉકળવા દેજો. દાળ ઘટ્ટ થાય એમ વધુ સ્વાદિષ્ટ લાગશે. તૈયાર છે ટેસ્ટી રસો.

હવે એક સર્વિંગ પ્લેટમાં ખમણ લઈ લો. તેના પર રસો નાખો. છેલ્લે તેના પર ઝીણા સમારેલા ટામેટાં, ડુંગળી, કોથમીર, નારિયેળનું ખમણ અને સેવ નાખીને ગરમા-ગરમ સર્વ કરો.