ગણેશચતુર્થીનો તહેવાર નજીકમાં છે ત્યારે અનેક લોકો તેની ખાસ તૈયારીઓ કરી લેતા હોય છે. કેટલાક લોકો ગણેશ ચતુર્થી માટે બહારથી તૈયાર ગણેશજીની મૂર્તિ લાવે છે, કેટલાક ઘરે ઈકો ફ્રેન્ડલી ગણેશજી બનાવે છે, કેટલાક ઘરના મંદિરમાં જે મૂર્તિ હોય તેની જ પૂજા કરવામાં માને છે. કેટલાક લોકો ચોકલેટના ગણપતિ બનાવીને તેની પૂજા કરે છે. અનેક નવા ટ્રેન્ડ ગણેશપૂજામાં અને મંદિરના ડેકોરેશનમાં પણ જોવા મળે છે.
આજે અમે આપને જણાવીશું કે ઘરે જ તમે કઈ રીતે સિમ્પલ સ્ટેપ્સની મદદથી ઈકો ફ્રેન્ડલી ગણેશજી બનાવી શકો છો. આ પ્રકારના ગણેશજીની પૂજા કરવાથી તમને આનંદ મળશે અને તમારા માટે યાદગાર ગણેશચતુર્થી બની રહેશે.
સામગ્રી
1 કિલો પેપરમિક્સ માટી અથવા ક્લે (કોઈપણ સ્ટેશનરી દુકાન પર મળી જશે)
પાણી જરૂર પ્રમાણે
ફિનિશિંગ માટે બ્રશ
માટીના વાસણ બનાવવામાં ઉપયોગમાં આવતી ચીજો જેમકે નાનું ચપ્પૂ, બોર્ડ અને પૉલીથિન.
રીત
આ રીતે તૈયાર કરો ક્લે અથવા માટી
સૌ પહેલા તમે એક સપાટ સ્થાન પર બોર્ડને મુકો. તેના પર પૉલીથિનને ટેપની મદદથી ચોંટાડી દો. હવે પેપર મિક્સ માટી અથવા ક્લે લો. તેને ત્યાં સુધી ગૂંથો જ્યાં સુધી તે તમારા હાથમાં ચોંટવી બંધ ન થાય. જો તમારી પાસે માટીનો પાવડર છે તો તમે તેને ગુંદર કે ફેવિકૉલની મદદથી ગૂંથી લો. હવે આને લોટની જેમ તૈયાર કરી લો. હવે આ ક્લે કે માટીને 3 એકસરખા ભાગમાં વહેંચી લો. હવે આ ત્રણ ભાગમાંથી 1 ભાગ લઈને ગોળો બનાવો અને આ ગોળાના 2 બરાબર ભાગ કરો.
આ રીતે બનાવો બેઝ અને ગણેશજીનું પેટ
આ બે માંથી એક ભાગથી આપણે બેઝ બનાવવાનો છે. જેના પર ગણેશજી બિરાજમાન થશે. બેઝ બનાવવા માટે એ ભાગને ગોળ લાડુનો આકાર આપીને હળવા હાથે દબાવીને ચપટો કરી દો. આની જાડાઈ લગભગ 0.5 મિમિ સુધી હોય અને સમગ્ર ગોળાની પહોળાઈ લગભગ 10થી 12 સેમી હોય. હવે આના બીજા ભાગને લઈને તેને ઈંડાનો આકાર આપો. આ અંડાકાર ભાગથી ગણપતિજીનું પેટ બનશે.
બનાવો ગરદન, સૂંઢ અને માથું
હવે ત્રીજા મોટા ભાગનો નંબર છે. હવે ગોળાને લઈને તેના પણ ચાર બરાબર ભાગ કરો. તેમાંથી એક ભાગને લઈને તેમાંથી થોડી માટી કાઢી લો અને તેમની ગરદન બનાવો. બાકી બચેલી માટીને ગોળ આકાર આપીને ગણપતિજીનું માથું બનાવો. હવે પેટની ઉપર ગરદન અને તેના પર માથાના શેપને જોડી દો. હવે બીજા ભાગને લઈને તેને સૂંઢનો આકાર આપો અને મોઢાના આગળના ભાગમાં નાકના સ્થાને જોડી દો.
બનાવી લો કાન, મુગટ અને દાંત
હવે ત્રીજો ભાગ લો અને તેના બે બરાબર ભાગ કરો. એક ભાગને લઈને રોટલી જેવો ચપટો કરી લો અને વચ્ચેથી કાપીને બે ભાગ કરો. આ બંને ભાગ ગણેશજીના કાન બનશે. હવે આ બંનેનો ગોળવાળો ભાગ માથાના બંને બાજુ ચોંટાડો અને કાનનો આકાર આપો. હવે તેના બીજા ભાગને લઈને તેને કોનનો આકાર આપો અને તેને માથા પર મુકુટના રૂપમાં મુકો. ચોથા ભાગને લઈને તેમાંથી થોડી માટી કાઢીને ગણેશજીના દાંત બનાવો. ગણેશજીના સીધા હાથની તરફ દાંત આખો હશે અને તેમના ડાબા હાથની તરફનો દાંત નાનો તૂટેલો રહેશે.
ગણેશજીનું વાહન ઉંદર બનાવો
હવે બચેલી માટીથી ઉંદર બનાવી લો. ઉંદર બનાવવા માટે માટીના ત્રણ ભાગ કરો. એક ભાગને અંડાકાર બનાવો. જેનાથી ઉંદરનુ પેટ બનશે. બીજા ભાગમાંથી ત્રણ ભાગ કરો. જેનાથી ઉંદરનુ માથુ, કાન અને પૂંછડી બનશે. ત્રીજા ભાગના ચાર ભાગ કરો અને ઉંદરના ચાર પગ બનાવો. તમે ચાહો તો આગળના બે પગને હાથની તરફ બનાવીને તેમાં લાડુ પણ મુકી શકો છો.
હવે તમારા ઈકો ફ્રેંડલી ગણેશજી તૈયાર છે. તેને બનાવ્યા પછી 3 થી 4 દિવસ સુધી તેને છાંયડામાં સુકાવવા દો અને તેના પર તમારી પસંદગીનો રંગ કરો. જેનાથી તે સુંદર દેખાશે. તમે આ ગણેશજીની પૂજા ગણેશોત્સવ દરમિયાન કરી શકો છો.