રેસિપી / બ્રેકફાસ્ટમાં પરિવારને પીરસો આ ગરમાગરમ પરાઠા, આપશે એનર્જી

જો સવારમાં તમે કોઈ વધારે માથાકૂટ વિના પરિવાર માટે હેલ્ધી નાસ્તો બનાવવા ઈચ્છો છો તો તમે ઝડપથી આ ગરમાગરમ પરોઠા પીરસી શકો છો. તેને માટેની તમામ ચીજો તમને રસોઈમાં મળી રહેશે. તેની સાથે તમે અથાણું, દહીં કે પછી ચા પણ સર્વ કરી શકો છો. તો રાહ કોની જુઓ છો તૈયારી કરી લો આ ખાસ પરાઠાની. 

કોથમીર પરાઠા 

સામગ્રી

-બે કપ ઘઉંનો લોટ 
-ત્રણ ટીસ્પૂન તેલ 
-મીઠું સ્વાદ અનુસાર   

સ્ટફિંગ માટે

-એક કપ કોથમીર 
-એક ટીસ્પૂન ધાણા પાવડર 
-એક ટીસ્પૂન જીરૂં પાવડર
-અડધી ટીસ્પૂન હળદર 
-એક ટીસ્પૂન ચણાનો લોટ 
-બે નંગ લીલા મરચાં સમારેલા 
-મીઠું સ્વાદ અનુસાર  

રીત  

સૌપ્રથમ ઘઉંના લોટમાં મીઠું અને તેલ ઉમેરીને સરસ મજાની કણક બાંધી લો. લોટને થોડીવાર માટે ઢાંકીને મૂકી રાખો. ત્યારબાદ એક બાઉલમાં સ્ટફિંગ માટેની જેટલી પણ સામગ્રી છે, તે બધી જ બરાબર મિક્સ કરી લો. હવે કણકમાંથી લુઆ લઈને રોટલી વળી લો. તેમાં વચ્ચે તૈયાર કરેલું પૂરણ મૂકીને ફરીથી બંધ કરીને વણી લો. ત્યારબાદ એક નોનસ્ટિક પેનને ગરમ કરો. તેમાં તૈયાર કરેલા પરાઠાને તેલ અથવા બટરમાં બંને બાજુ લાઈટ બ્રાઉન રંગના થાય ત્યાં સુધી શેકી લો. તૈયાર ટેસ્ટી પરાઠાને ચા સાથે સર્વ કરો.