ટ્રક ટ્રાન્સપોર્ટર્સની હડતાળનો આજે ચોથો દિવસ થંભી ગયા 6 લાખ પૈડા

અમદાવાદઃ દેશભરના ટ્રક ચાલકો પોતાની 5 માગોને લઈને હડતાળ પર ઉતર્યા છે. ટ્રક ચાલકોની હડતાળનો આજે ચોથો દિવસ છે. ટ્રક ચાલકોની હડતાળને લઈને દેશભરમાં આયાત નિકાસ બંધ થયો છે. શાકભાજીના ભાવમાં 20 ટકા જેટલો વધારો થયો છે. જ્યારે પેટ્રોલ ડિઝલના વપરાશમાં પણ ઘટાડો થયો છે.

પેટ્રોલ પંપ કાપડ માર્કેટ ટોલ ટેક્સની આવકમાં ઘટાડો થયો છે. માલ પરિવહન ક્ષેત્રે 8 હજાર કરોડ રૂપિયાનુ નુકસાન થયુ છે. ઉદ્યોગ ક્ષેત્રે 20 હજાર કરોડ રૂપિયાના નુકસાનનો દાવો કરવામાં આવ્યો છે. મહત્વનુ છે કે દેશભરમાં 93 લાખ જેટલા ટ્રક અને ટેમ્પો ચાલકો હડતાળમાં જોડાયા છે.

ટ્રક ચાલકોના આ દેશવ્યાપી આંદોલનના કારણે અર્થવ્યવસ્થા પર ભારે અસર થઇ રહી છે. માલ પરિવહન ક્ષેત્ર કરોડોનું નુકસાન થયું છે. 50 લાખથી વધુ પ્રવાસી વાહનોએ ભાગ લીધો હોવાનો સંગઠનનો દાવો છે.

શું છે ટ્રાન્સપોર્ટર્સની માગ ?
દેશભરના ટ્રાન્સપોર્ટર્સે સરકાર સમક્ષ 5 માગ મુકી છે. ડીઝલના ભાવોને GSTમાં સમાવવામાં આવે. સમગ્ર દેશમાંથી ટોલ ટેક્સ નાબૂદ કરવામાં આવે. થર્ડ પાર્ટી વિમા પરથી 18 ટકા GSTને દૂર કરવામાં આવે. એજન્ટ કમિશનને સમાપ્ત કરવામાં આવે. આવક પર લાગતો TDS નાબૂદ કરવામાં આવે. ઈ-વે બિલમાં સુધારો કરવામાં આવે.