અમદાવાદ / ટ્રકમાં ભૂંસાની બોરીમાં છુપાવેલો ૧૭ લાખનો ઈંગ્લિશ દારૂ ઝડપાયો

અમદાવાદ ક્રાઇમ બ્રાંચને બાતમી મળી હતી કે દહેગામથી એક દારૂ ભરેલી ટ્રક નરોડા તરફ આવી રહી છે અને જે થોડાક સમયમાં જીઇબીની ઓફિસ પાસેથી પસાર થવાની છે. આ ટ્રકનું પાયલટિંગ એક અલ્ટો કાર કરી રહી છે. જે ટ્રક ડ્રાઇવર સાથે ટેલિફોનિક સંપર્કમાં છે.

બાતમીના આધારે પોલીસે વોચ ગઠવી દેતા એક રાજસ્થાન પાસિંગની કાર આવી હતી. પોલીસે પહેલાં તો કારને રોકી તેમાં બેઠેલા જિતેન્દ્રસિંગ રાઠોડ, રાજેન્દ્રસિંગ રાઠોડની અટકાયત કરી હતી. બાદમાં પાછળ આવતી ટ્રક પોલીસે રોકી અને તેમાંથી ડ્રાઇવર અશરફઅલી મન્સુરી અને ક્લીનર અલી મહંમદ અલવીની અટકાયત કરી હતી.

પોલીસે ટ્રકની તપાસ કરી તો તેમાં ચોખાનાં ભુસાંની બોરીઓ પડી હતી. બોરી હટાવીને જોતાં પોલીસ ચોંકી ઊઠી હતી. કારણ કે તેમાં મોટા પ્રમાણમાં દારૂનો જથ્થો હતો. બોરીની પાછળના ભાગે દારૂની વિદેશી બ્રાન્ડની પેટીઓ પડી હતી.

પોલીસે ક્રાઇમ બ્રાંચે આ મુદ્દામાલ લાવી ગણતરી કરતાં કુલ ૫૦૪૦ નંગ દારૂની બોટલોનો જથ્થો ટ્રકમાંથી મળ્યો હતો. પોલીસે ૧૭ લાખનો દારૂ, ૧૦ લાખની ટ્રક, કાર અને મોબાઇલ ફોન સહિતનો કુલ ૩૦ લાખનો મુદ્દામાલ કબજે કર્યો હતો.

પોલીસે આરોપીઓની પૂછપરછ કરતાં તેઓએ કબૂલાત કરી કે આ જથ્થો હરિયાણાના અંબાલામાં એક ઢાબા પરથી સુરેન્દ્ર ચૌધરી નામના શખસે ભરી આપ્યો હતો. અને આ જથ્થો રાજસ્થાનના સી.પી. નામના કોઇ શખ્સે મંગાવ્યો હતો પણ ડિલિવરી ક્યાં કરવાની હતી તે બાબતે જણાવાયું ન હોવાનું જણાવ્યું હતું. હાલ સમગ્ર મામલે પોલીસે ચાર લોકોની ધરપકડ કરી દારૂ આપનાર અને મંગાવનારની શોધખોળ હાથ ધરી છે.