આજે અરવલ્લી, નવસારી, વડોદરા, પાટણ સહિત ચાર સ્થળોએ અકસ્માતની ઘટના સામે આવી હતી. જેમાં એક યુવાનનું મોત નિપજતા અરેરાટી મચી જવા પામી છે.
મોડાસા પાસે 2 ઇક્કો કાર અને ક્રુઝર વચ્ચે જોરદાર ટક્કર
અકસ્માતમાં ૧૦ થી વધુ લોકો ઘાયલ થયા
અરવલ્લી જિલ્લામાં આજે અકસ્માતની ગંભીર ઘટના સામે આવી હતી. જેમા મોડાસા પાસે 2 ઇક્કો કાર અને ક્રુઝર વચ્ચે જોરદાર ટક્કર સર્જાતા એક યુવાનનું મોત નીપજ્યું હતું. મેઘરજ રોડ પર આવેલ બ્લોક ફેક્ટરી પાસે સર્જાયેલા અકસ્માતમાં ૧૦ થી વધુ લોકો ઘાયલ થયા હતા. જ્યારે 2 લોકોની હાલત ગંભીર હોવાનું જાણવા મળી રહ્યું છે. મહત્વનું છે કે હોળીના તહેવારમાં વતન જતા મુસાફરોને નડેલા અકસ્માતના એક યુવાનનું મોત નિપજતા અરેરાટી મચી જવા પામી છે. આ અંગે જાણ થતાં સ્થાનિક લોકોએ દોડી આવી ઇજાગ્રસ્તોને બહાર કાઢ્યા હતા.
ચાણસ્મા તાલુકામાં એસટી બસનો અકસ્માત
તો વધુ એક અકસ્માતની ઘટના પાટણના ચાણસ્મામાં ખાતે સામે આવી હતી. જીતોડાથી ગંગેટ જવાના માર્ગ પર એસટી બસનો અકસ્માત થયો હતો. ચાલુ બસે અચાનક ડ્રાઈવરની તબિયત લથડી હતી. જેને લઈને બસ રોડની સાઈડ પરના તોતિંગ વ્રુક્ષ સાથે અથડાઈ હતી. આ દરમિયાન અકસ્માતમાં ડ્રાઈવરના બન્ને પગમાં ગંભીર ઈજા થઇ હતી. આથી બસ ચાલકને સારવાર અર્થે ખસેડવામા આવ્યો હતો. આ ઉપરાંત અન્ય 4 જેટલા મુસાફરો પણ ઈજાગ્રસ્ત થયા હોવાનું જાણવા મળી રહ્યું છે.
વડોદરામાં કાર ચાલક મહિલા અને એકટીવા વચ્ચે અકસ્માત
વડોદરાની સુપર બેકરી પાસે કાર અને એક્ટિવા વચ્ચે ગંભીર અકસ્માતની ઘટના સામેં આવી હતી. જેમાં એકટીવા ચાલક રોડ ક્રોસ કરી રહ્યો હતો.આ દરમિયાન બેફામ સ્પીડે આવતી કાર ચાલકે જોરદાર ટક્કર મારી હતી. આ ઘટનામાં કાર ચાલકે સ્ટેરિંગ પરનો કાબૂ ગુમાવી દેતા ફૂલ સ્પીડમાં ચાલતી કારએ એક્ટિવાને અડફેટે લીધી હતી. આ ઘટનાને લઈને આજુબાજુના લોકો અને રોડ પરથી પસાર થતા વાહન ચાલકો દોડી જતા મોટી સંખ્યામાં લોકોના ટોળે ટોળાં એકઠા થયા હોય તેવા દ્રશ્યો સર્જાયા હતા.ત્યારબાદ એકટીવા ચાલકને ગંભીર ઇજા થતાં તાત્કાલિક સારવાર માટે હોસ્પિટલ ખસેડવા સહિતની કાર્યવાહી હાથ ધરવામાં આવી હતી. આ મામલે સમગ્ર ઘટનાના CCTV ફૂટેજ સામેં આવ્યા છે.
કારનું સ્ટેરીંગ અચાનક લોક થઈ જતા બની દુર્ઘટના
નવસારીમાં કારને અકસ્માત નડ્યો હતો. જેમાં અલીફ નગર પાસે કારનું સ્ટેયરિંગ અચાનક લોક થઈ જતા દુર્ઘટના બની હતી. ત્યારબાદ બેકાબૂ કાર થાંભલો તોડી ડિવાઇડર પડ ચઢી જતા સ્થાનિકોમાં નાસભાગ મચી જવા પામી હતી. સદનસીબે આ ઘટનામાં કોઈ જાનહાનિ ન થતા લોકોએ રાહતનો શ્વાસ લીધો હતો.