અમદાવાદના મોટેરા વિસ્તારમાં મોડી રાતે કાર, બાઈક અને રિક્ષા વચ્ચે ત્રિપલ અકસ્માત સર્જાયો. અકસ્માતમાં રિક્ષાચાલકનું ઘટના સ્થળે મોત
મોટેરા વિસ્તારમાં સર્જાયો ત્રિપલ અકસ્માત
અકસ્માતમાં રિક્ષાચાલકનું ઘટના સ્થળે મોત
બાઈક ચાલક હોસ્પિટલમાં સારવાર હેઠળ
અમદાવાદમાં ગત મોડી રાતે મોટેરા ગામ પાસે ભયંકર અકસ્માત સર્જાયો હતો. કાર, બાઈક અને રીક્ષા વચ્ચે આ ત્રીપલ અકસ્માત સર્જાયો હતો. અકસ્માત એટલો ભયંકર હતો કે કારના કૂચેકૂચા ઉડી ગયા હતા. સાથેજ અકસ્માત બાદ રોડ પર ભારે ટ્રાફીક જામ થઈ ગયો હતો.
રીક્ષાચાલકનું ઘટના સ્થળે મોત
કાર ચાલકે ફુલ સ્પીડમાં સ્ટેરીંગ પરથી કાબૂ ગુમાવ્યો જેના કારણે આ અકસ્માત સર્જાયો હતો. જેમા કારચાલકે સામેથી આવતી રીક્ષા અને બાઈકને ટક્કર મારી હતી. આ અકસ્માત એટલો ગંભીર હતો કે રિક્ષા પલટી જતા રીક્ષા ચાલકનું ઘટના સ્થળેજ મોત નિપજ્યું હતું જ્યારે બાઈકસવાર ગંભીર રીતે ઘાયલ થતા તેને હોસ્પિટલમાં સારવાર અર્થે ખસેડાયો હતો.
કારે ટક્કર મારી
સમગ્ર મામલે પ્રત્યક્ષદર્શીઓનું કહેવું છે કે કારચાલક ફુલ સ્પીડમાં કાર ચલાવી રહ્યો હતો. સામેથી આવતી રિક્ષાને તેણે એવી ટક્કર મારી કે રીક્ષા ત્યાજ પલટી ગઈ હતી. રીક્ષાની પાછળ બાઈકચાલક હતો તેને પણ ટક્કર વાગી જેથી તે ફંગોળાઈને પડ્યો હતો. જોકે લોકોએ તેને તાત્કાલીક હોસ્પિટલમાં સારવાર અર્થે ખસેડ્યો. પરંતુ રીક્ષા ચાલકનું તો ઘટના સ્થળેજ મોત નિપજ્યું હતું.
કારમાંથી દારૂની બોટલો મળી આવી
ઉલ્લેખનીય છે કે અકસ્માતને લઈને એલ ડિવિઝન ટ્રાફિક પોલીસે તપાશ શરૂ કરી છે. કારચાલકની કારમાંથી દારૂની બોટલો મળી હોવાનું સામે આવ્યું છે. જોકે કારચાલક દારૂ પીને ગાડી ચલાવી રહ્યો હતો કે નહી તે મામલે હજું કોઈ માહિતી સામે નથી આવી. સમગ્ર મામલે બાઈક ચાલકની ફરિયાદ નોંધીને પોલીસે કાયદેસરની કાર્યવાહી હાથ ધરી છે.