પુરૂષો દ્વારા મહિલાઓને ત્રાસ આપવાના અનેક કિસ્સાઓ બનતા હોય છે પરંતુ સુરતમાં અલગ જ કિસ્સો સામે આવ્યો છે. સુરતમાં પત્નીના ત્રાસથી પતિએ આપઘાતનો પ્રયાસ કર્યાની ઘટના સામે આવી છે. પતિએ ઉંઘની ગોળી ખાધી અને હાથની નસ કાહી હતી. પત્ની, સાળા અને સસરાના ત્રાસથી યુવકે પગલુ ભર્યુ હતું. તો પત્નીનો બેટ વડે મારમારતી હોવાનો વીડિયો પણ વાયરલ થયો છે.
સુરતમાં પત્નીના ત્રાસથી પતિનો આપઘાતનો પ્રયાસ
પત્નીએ યુવકને બેટ વડે માર પણ મર્યો હોવાની ઘટના
સુરતના ગોડાદરા વિસ્તારમાં યુવકનો આપઘાત પ્રયાસ
સુરતમાં પતિએ પત્નીના આડા સંબંધોનો ભાંડો ફોડ્યો તો પત્ની તેના પર તૂટી પડી હતી. પત્નીએ પતિને બેટ વડે માર મારીને ઘરમાંથી કાઢી મુક્યો હતો. પત્નીના દમનથી કંટાળેલા પતિએ પોતાનું દર્દ વર્ણવતો વીડિયો બનાવ્યો હતો. આ વીડિયો બનાવતા સમયે જ ઉંઘની ગોળી ખાઇ અને હાથની નસ કાપીને આપઘાતનો પ્રયાસ કર્યો હતો. હાલ આ યુવક હોસ્પિટલમાં સારવાર હેઠળ છે.
મળતી માહિતી અનુસાર, સુરતના ગોડાદરા વિસ્તારમાં શ્યામ હાઇટ્સમાં ગણેશભાઇ રહે છે. તેઓ ઉધના ખાતે કોર્પોરેટ સર્વિસ સ્ટેશનમાં લોન ડિપાર્ટમેન્ટમાં નોકરી કરે છે. તેમના લગ્ન એક યુવતિ સાથે સમાજના રીતિરિવાજ પ્રમાણે થયા હતા. આ બન્નેને એક દીકરો અને એક દીકરી પણ છે. જોકે યુવકને જાણ થઇ કે તેની પત્નીના અન્ય યુવક સાથે પ્રેમ સંબંધ છે. યુવકે તેની પત્નીને સમજાવી કે તે આડા સંબંધોનો અંત લાવે. જો કે, પત્ની આ મુદ્દે સમજવા તૈયાર નહોતી અને વારંવાર ઝઘડા કરતી હતી.
એક વર્ષ અગાઉ પત્નીએ પતિ વિરુદ્ધ ફરિયાદ નોંધાવી હતી
જોકે એક વર્ષ અગાઉ પત્નીએ પતિ વિરુદ્ધ લિંબાયત પોલીસમાં મારઝૂડ કર્યાની ફરિયાદ નોંધાવી હતી. જે ગુનામાં પોલીસે ગણેશની અટકાયત પણ કરાઇ હતી. આજથી અંદાજે ચાર મહિના અગાઉ સાળા અને સસરા પણ પારિવારિક ઝઘડાને લઈને યુવકને માર માર્યો હતો. સસરાએ યુવકને ધમકી આપી હતી કે જો હવે પછી મારી દીકરી પાસે આવીશ તો જાનથી મારી નાંખીશ. સસરાએ જમાઇને અપમાનિત કરીને ઘરમાંથી કાઢી મૂક્યો હતો.
આપઘાતનો પ્રયાસ કરતા પહેલા યુવકનો વીડિયો બનાવ્યો
23 ઓક્ટોબરે બાળકોને મળવા માટે યુવક ઘરે ગયો હતો. આ સમયે પત્નીએ ઝઘડો કરી ધમકી આપી હતી. યુવક ઘરે જતા પત્ની અને સાળો માર મારતા હતા. જેને લઇને પતિને ઉંઘની ગોળીઓ ખાઇ અને ડાબા હાથની નસ કાપી આપઘાતનો પ્રયાસ પણ કર્યો હતો. આ ઘટનાનો યુવકે એક વીડિયો પણ બનાવ્યો હતો. જેમાં તેણે પોતાની વ્યથા વર્ણવી છે. હાલ ઇજાગ્રસ્ત યુવકની સ્મિમેર હોસ્પિટલમાં સારવાર ચાલી રહી છે. તો બીજી તરફ લિંબાયત પોલીસે યુવકની ફરિયાદના આધારે પત્ની, સાળા અને સસરા વિરૂદ્ધ ગુનો નોંધી તપાસ શરૂ કરી છે.