અમદાવાદ / 130 કિમીની ઝડપે દોડતી વંદે ભારત ટ્રેનનું આજે ફરી કરાયું ટ્રાયલ રન, 30 સપ્ટેમ્બરે PM મોદી કરાવશે ફ્લેગ ઓફ

• પાટા પર દોડશે વંદે ભારત એક્સપ્રેસ ટ્રેન
• PM મોદી વંદે ભારત એક્સપ્રેસ ટ્રેનનું ફ્લેગ ઓફ કરાવશે
• ફ્લેગ ઓફ કરાવતા પહેલા ફરી ટ્રાયલ રન કરાયું

ગુજરાતની જનતાને ટૂંક સમયમાં વંદે ભારત એક્સપ્રેસ ટ્રેનની ભેટ મળવા જઈ રહી છે. પીએમ મોદી આગામી 30 સપ્ટેમ્બરના રોજ આ ટ્રેનને લીલી ઝંડી આપશે. ત્યારે આજે ફરીવાર વંદે ભારત ટ્રેનનું ટ્રાયલ રન કરવામાં આવ્યું. આપને જણાવી દઈએ કે, ગઈકાલે પણ અમદાવાદ-મુંબઈ વચ્ચે વંદે ભારત ટ્રેનનું ટ્રાયલ કરાયું હતું. 130 કિમી પ્રતિ કલાકની ઝડપે દોડતી ટ્રેનનું અમદાવાદથી ટ્રાયલ કરાયું હતું. 

30 સપ્ટેમ્બરે બતાવશે લીલી ઝંડી

વડાપ્રધાન નરેન્દ્ર મોદી 30 સપ્ટેમ્બરે સવારે વંદે ભારત ટ્રેનનું લોકાર્પણ કરશે, જે બાદ તેઓ આ ટ્રેનમાં લગભગ 30 કિલોમીટરની મુસાફરી કરી ગાંધીનગરથી કાલુપુર રેલવે સ્ટેશન આવશે. પીએમ મોદી કાલુપુર ખાતે બનાવાયેલા મેટ્રો સ્ટેશનની મુલાકાત લેશે અને અમદાવાદ મેટ્રોને લીલી ઝંડી બતાવશે. પીએમ મોદીના પ્રવાસને લઈને તડામાર તૈયારીઓ કરવામાં આવી રહી છે.  

ટ્રેનમાં મુંબઇનું ભાડું રહેશે 3500 રુપિયા

મહત્વનું છે કે, આજે ફરી સેમી હાઇ સ્પીડ ટ્રેનનું ટ્રાયલ રન કરાયું હતું, ત્યારે હવે નવરાત્રીમાં અમદાવાદ-મુંબઇ વચ્ચે વંદે ભારત ટ્રેન દોડતી થઈ જશે. તમને જણાવી દઇએ કે, 1128 પેસેન્જરની ક્ષમતાવાળી ટ્રેનમાં મુંબઇનું ભાડું 3500 રુપિયા રહેશે.

જાણો વંદે ભારત એક્સપ્રેસની ખાસિયતો વિશે

- કુલ 16 કોચ ધરાવતી આ ટ્રેન સામાન્ય શતાબ્દી ટ્રેનની સરખામણીએ ઓછો સમય લેશે.
- વંદે ભારત એક્સપ્રેસની 180 કિલોમીટર પ્રતિ કલાકની મહત્તમ ઝડપ.
- ટ્રેનના મધ્યમાં બે ઉચ્ચ વર્ગના કંપાર્ટમેન્ટ હશે અને પ્રત્યેકમાં 52 સીટ હશે.
- જ્યારે સામાન્ય કોચમાં 78 સીટ હશે.
- ટ્રેનમાં એકસાથે 1,128 યાત્રીઓ મુસાફરી કરી શકશે.
- વંદે ભારત એક્સપ્રેસમાં GPS,અલગ પ્રકારની લાઇટ, ઑટોમૅટિક દરવાજા અને CCTV સહિતની સુવિધાઓ ઉપલબ્ધ હશે.
- આ ટ્રેન વાઈફાઈ, AC,વ્યક્તિગત ચાર્જિંગ સૉકેટ જેવી સુવિધાઓથી સજ્જ હશે.