2020-21ના એક વર્ષમાં દેશના આઠ રાજકીય પક્ષોને 1,373 રુપિયાની કમાણી થઈ હોવાનો ADRના રિપોર્ટમાં જણાવાયું
આઠ રાજકીય પક્ષોની આવકને લઈને ADRએ બહાર પાડ્યો રિપોર્ટ
2020-21માં આઠ રાજકીય પક્ષોને થઈ 1,373 કરોડની કમાણી
ભાજપને સૌથી વધારે 752 કરોડ મળ્યાં
બીજો નંબર કોંગ્રેસનો, 285 કરોડની આવક થઈ
રાજકીય પક્ષોના ખજાનમાં કદી પણ ઓટ આવતી નથી. હંમેશા તેમનો ખજાનો ભરાયેલો જ રહેતો હોય છે. છેલ્લા એક વર્ષમાં 8 રાષ્ટ્રીય પક્ષોને દાન-ફંડફાળો કે બીજી કોઈ રીતે કેટલી આવક થઈ તેનો એક રિપોર્ટ બહાર આવ્યો છે. દેશમાં આજ દિન સુધી સૌથી વધારે રાજકીય દાન અને ફંડફાળો મેળવનાર ભાજપ રહ્યો છે. ભાજપની આવક દિનપ્રતિદિન વધતી જાય છે અને તેનો ખુલાસો અવારનવાર એડીઆરના રિપોર્ટમાં કરાતો હોય છે. વધુ એક વાર એડીઆર રિપોર્ટમાં ભાજપની આવક વધી હોવાનો દાવો કરાયો છે.
દેશની આઠ રાષ્ટ્રીય પાર્ટીઓને મળ્યાં 1,373 કરોડ
2020-21 દરમિયાન દેશની આઠ રાષ્ટ્રીય પાર્ટીઓએ કુલ 1,373.783 કરોડ રૂપિયાની કમાણી કરી હતી. એકલા ભાજપનો હિસ્સો લગભગ 55 ટકા જેટલો છે.
ભાજપ, કોંગ્રેસ સહિત આઠ રાજકીય પક્ષોના હિસાબો બહાર આવ્યાં
એસોસિએશન ફોર ડેમોક્રેટિક રિફોર્મ્સ (એડીઆર) દ્વારા શુક્રવારે એક નવા અહેવાલમાં આ દાવો કરવામાં આવ્યો છે. જે પક્ષોની આવકના હિસાબો બહાર આવ્યા છે તેમાં ભાજપ, કોંગ્રેસ, બસપા, એનસીપી, સીપીઆઈ, સીપીએમ, તૃણમૂલ કોંગ્રેસ અને એનપીપીનો સમાવેશ થાય છે. આ તમામ પક્ષોને ચૂંટણી પંચ તરફથી રાષ્ટ્રીય પક્ષનો દરજ્જો મળ્યો છે.
કયા પક્ષની કેટલી આવક?
ગત નાણાકીય વર્ષમાં ભાજપે કુલ 752.337 કરોડ રૂપિયાની કમાણી કરી હતી. જે દેશના તમામ રાષ્ટ્રીય પક્ષોની આવકના 54.764 ટકા છે. તેમણે પોતાની કુલ આવકના 82.46 ટકા એટલે કે 620.398 કરોડ રૂપિયા ખર્ચ કર્યા હતા. આવકની દ્રષ્ટિએ કોંગ્રેસ બીજા નંબરે આવી હતી. ગયા નાણાકીય વર્ષમાં તેમની કુલ આવક 285.765 રૂપિયા હતી. જે દેશના તમામ રાષ્ટ્રીય પક્ષોની કુલ આવકના 20.801 ટકા છે. કોંગ્રેસે પોતાની આવકના 73.137 ટકા એટલે
કે 209 કરોડ રૂપિયા ખર્ચ કર્યા હતા. આવકની દ્રષ્ટિએ સીપીએમ ત્રીજા નંબરે રહી હતી. તેમની કુલ આવક 171.046 કરોડ હતી.
ટીએમસીએ આવક કરતા વધુ ખર્ચ કર્યો
મમતા બેનર્જીની પાર્ટી ટીએમસીની ગત નાણાકીય વર્ષમાં કુલ આવક 74.417 કરોડ રૂપિયા રહી હતી. પાર્ટીએ આ સમયગાળા દરમિયાન કુલ 132.537 કરોડ રૂપિયા ખર્ચ કર્યા. એટલે કે આવક સામે ટીએમસીનો ખર્ચ 178 ટકાથી વધુ હતો. આ સાથે જ બસપા પાસે કુલ 52.467 કરોડ હતા. જ્યારે, તેણે માત્ર 17.297 કરોડ રૂપિયા ખર્ચ કર્યા હતા. એટલે કે બસપાએ આવક સામે માત્ર 32.96 ટકા જ ખર્ચ કર્યો હતો.
એડીઆર મુજબ તમામ પક્ષોની આવક ગયા વર્ષ કરતા ઘટી
રાષ્ટ્રીય પક્ષોએ ચૂંટણી પંચને આપેલી વિગતો મુજબ ભાજપની આવકમાં ગત વર્ષની સરખામણીએ 79.24 ટકાનો ઘટાડો થયો છે. વર્ષ 2019-20માં ભાજપની કુલ આવક 3,623.28 કરોડ રૂપિયા હતી જે આ વખતે ઘટીને માત્ર 752.337 કરોડ રૂપિયા થઈ ગઈ છે. એ જ રીતે કોંગ્રેસની આવકમાં પણ 58.11 ટકાનો ઘટાડો થયો છે. 2019-20માં પાર્ટીની આવક 682.21 કરોડ રૂપિયા હતી, જે પાછલા નાણાકીય વર્ષમાં ઘટીને 285.765 કરોડ રૂપિયા રહી ગઈ છે. 2019-20ની સરખામણીએ ગત નાણાકીય વર્ષમાં અન્ય છ રાષ્ટ્રીય પક્ષોની આવકમાં ઘટાડો થયો છે. ટીએમસીના 48.20 ટકા, એનસીપીના 59.19 ટકા, બસપાની આવક 9.94 ટકા, સીપીઆઈની 67.65 ટકા અને એનપીપીની 62.91 ટકા આવક છે.