ભ્રષ્ટાચાર / રાજકોટમાં પૈસા પડાવતા કેમેરામાં કેદ થયા TRB જવાન, તમને કોઈ રોકે તો જાણો તમારી પાસે શું છે અધિકાર 

• રાજકોટમાં ટ્રાફિક કર્મચારીઓ રૂપિયા ઉઘરાવતા જોવા મળ્યા
• કેકેવી ચોક નજીક રૂપિયા ઉઘરાવતા જોવા મળ્યા ટ્રાફિકકર્મી
• એક્ટિવા ચાલક પાસેથી રૂપિયા ઉઘરાવતા જોવા મળ્યા ટ્રાફિકકર્મી
• રૂપિયા લેવાની ઘટના જાગૃત નાગરિકે કેમેરામાં કરી કેદ

ગુજરાતમાં વિધાનસભાની ચૂંટણીના પડઘમ વચ્ચે રાજકોટ પોલીસની કામગીરી પર સવાલ ઊભો કરતો એક વિડીયો સામે આવ્યો છે. વાત જાણે એમ છે કે, હાલમાં સોશિયલ મીડિયામાં એક વિડીયો વાયરલ થઈ રહ્યો છે જેમાં રાજકોટ પોલીસના ટ્રાફિક કર્મચારીઓ રૂપિયા ઉઘરાવતા જોવા મળ્યા છે. જોકે આ વિડીયો બાદ અનેક સવાલો ઊભા થયા છે કે, આ ટ્રાફિકકર્મી વિરુદ્ધ કાર્યવાહી ક્યારે થશે ?, ટ્રાફિકકર્મીઓ રોજ કેટલા લોકો પાસેથી રૂપિયા ઉઘરાવે છે ? , વાહન ચાલકને દંડ ફટકારવાને બદલે રૂપિયાની ઉઘરાણી કેમ? 

રાજકોટના કેકેવી ચોક નજીક ટ્રાફિકકર્મી રૂપિયા ઉઘરાવતા જોવા મળ્યા હોવાનો વિડીયો સોશિયલ મીડિયામાં વાયરલ થયો છે. પ્રાથમિક વિગતો મુજબ ટ્રાફિકકર્મી એક એક્ટિવા ચાલક પાસેથી રૂપિયા ઉઘરાવતા જોવા મળ્યા છે. જોકે રૂપિયા લેવાની ઘટના જાગૃત નાગરિકે કેમેરામાં કેદ કરી લીધી છે. આ રૂપિયા લેવાનો વીડિયો સોશિયલ મીડિયામાં વાયરલ થતાં હવે રાજકોટ પોલીસની કામગીરીને લઈ અનેક સવાલો ઊભા થયા છે. 

સળગતા સવાલો 

• રાજ્યમાં ભ્રષ્ટાચાર ક્યારે બંધ થશે?
• આ ટ્રાફિકકર્મી વિરુદ્ધ કાર્યવાહી ક્યારે થશે?
• ટ્રાફિકકર્મીઓ રોજ કેટલા લોકો પાસેથી રૂપિયા ઉઘરાવે છે?
• વાહન ચાલકને દંડ ફટકારવાને બદલે રૂપિયાની ઉઘરાણી કેમ?
• શું રાજકોટના ટ્રાફિકકર્મીઓ પોતાની ફરજ ભૂલ્યા છે?
• તમને પગાર મળે છે, તો પછી તોડ કેમ કરો છો?
• આવા ટ્રાફિકકર્મી વિરુદ્ધ દાખલારૂપ કાર્યવાહી કેમ નથી થતી?

TRB જવાન એટલે શું ? 

TRBનો અર્થ છે ટ્રાફિક બ્રિગેડ. તેમની ઓળખ અમદાવાદ સહિત અમુક જિલ્લાઓમાં 'ટ્રાફિક વોર્ડન' તરીકેની છે. TRB જવાનને  પોલીસ ન કહી શકાય. ટ્રાફિક નિયમનમાં મદદરૂપ થાય તેને TRB જવાન કહેવાય છે. 

TRBના જવાન પાસે ખરેખર કઈ સત્તા હોય છે? 

ના TRB જવાન પાસે ટ્રાફિક પોલીસ જેવી સત્તા હોતી નથી. તેમની મુખ્ય કામગીરી   ટ્રાફિક નિયમનની જ  છે. અન્ય કોઈ જ સત્તા તેમની પાસે નથી. 

TRB જવાન વાહનચાલકને રોકી દસ્તાવેજ માગી શકે?

ટ્રાફિક બ્રિગેડની કામગીરીમાં ચેકિંગ કે દસ્તાવેજ તપાસવાનું આવતું નથી. તેમનું કામ માત્ર ટ્રાફિકનું સંચાલન કરવાનું જ છે અને યાતાયાત સરળતાથી થઈ શકે એ જોવાનું છે. 

TRB જવાન વાહન ચાલકને અટકાવી શકે ખરા?

ના. તમામ કામગીરી ટ્રાફિક શાખાના કર્મચારી જ છે. TRB જવાન કોઇની અટકાયત ન કરી શકે. 

TRB જવાન મેમો બનાવી શકે ?   

ના. તેમની પાસે એવી કોઈ સત્તા નથી. તેઓ વાહનચાલકને અટકાવી ન શકે તથા તેમની પાસેથી દસ્તાવેજ પણ ન માગી શકે. ચલણ આપવાની કે વાહનચાલકને અટકાવવાની કામગીરી ટ્રાફિક પોલીસની જ છે. 

TRB જવાનની ગેર વર્તૂણકની ફરિયાદ ક્યાં કરી શકાય?

TRB જવાનની ફરિયાદ દરેક શહેરની ટ્રાફિક શાખામાં કરી શકાય છે.  ટ્રાફિક DCP અને JCPને પણ ફરિયાદ કરી શકાય. આ ઉપરાંત, પોલીસ કમિશનર સમક્ષ પણ ફરિયાદ કરી શકાય. 

TRB જવાનની ભરતી અને ડ્યૂટીની સમય મર્યાદા નક્કી હોય છે ?

TRB જવાનની 8 કલાકની રોજની ડ્યૂટી હોય છે તથા તેઓ અમદાવાદમાં થયેલ ભરતી મુજબ 3 વર્ષ ફરજ બજાવી શકે છે. 

TRB જવાનનું વેતન કેટલું હોય ?

TRB જવાનને ચોક્કસ પગાર આપવામાં આવતો નથી. તેમને માનદ વેતન આપવામાં આવે છે જેમકે લગભગ 300 રૂપિયા પ્રતિ દિવસ. 

વાહનના દસ્તાવેજ સાથે નથી તેવા સંજોગોમાં શું કરવું ?

વાહનોના દસ્તાવેજ હવે તામી તમારા મોબાઇલમાં જ સાચવી શકો છો. આ માટે Mparivahan ઍપ કે પછી digilocker ઍૅપમાં દસ્તાવેજ સાચવી શકાય.