હવે ટૂંક સમયમાં ટ્રેનમાં યાત્રા કરવી મોંઘી પડશે. હકીકતમાં રેલવે અનેક મોટા સ્ટેશનો પણ યુઝર ફીસ વસૂલવાની તૈયારી કરી રહ્યું છે. આ ટ્રેનની ટિકિટનો ભાગ હશે. એક રિપોર્ટ અનુસાર એસી કોચમાં યાત્રા કરનારાઓએ વધુ યુઝર ફીસ ચૂકવવી પડશે. એસી1માં યાત્રા કરનારા પેસેન્જર્સને 30 રૂપિયા યુઝર ફીસ ચૂકવવી પડશે. એસી2 અને એસી 3માં યાત્રા કરનારા પેસેન્જર્સ માટે યુઝર્સ ફીસ ઓછી હશે, જ્યારે સ્લીપર ક્લાસના યાત્રીઓ માટે સાધારણ હશે.
રેલવેના મુસાફરો માટે કામના સમાચાર
હવે તેમને ચૂકવવી પડશે આ ફીસ
રિપોર્ટ અનુસાર ન્યૂનતમ યુઝર ફી 10 રૂપિયા હશે. રેલ્વે મંત્રાલય આ સંદર્ભે એક પ્રસ્તાવ પર કામ કરી રહ્યું છે, જેને ટૂંક સમયમાં મંજૂરી માટે કેબિનેટમાં મૂકવામાં આવશે. સૂત્રોના જણાવ્યા મુજબ, બિનઅનામત વર્ગ અને ઉપનગરીય રેલવે મુસાફરો પાસેથી લઘુત્તમ યુઝર ફી એકત્રિત કરવાની છે કે નહીં તે અંગે ચર્ચા ચાલી રહી છે.
રેલવે મંત્રાલય કેબિનેટની મંજૂરી માટે જે પ્રપોઝલ તૈયાર કરી રહ્યું છે તે મુજબ, મુસાફરને યુઝર ફી ભરવાની રહેશે. ઉપરાંત, જો તમે કોઈને ડ્રોપ કરવા અથવા લેવા માટે રેલવે સ્ટેશન પર ગયા છો, તો તમારે પ્લેટફોર્મ ટિકિટ ઉપરાંત વિઝિટર ફી પણ ચૂકવવી પડી શકે છે.
યુઝર ફીથી ઘણી કંપનીઓને થશે ફાયદો
રેલવે બોર્ડના સીઇઓ અને અધ્યક્ષ વી.કે. યાદવે હાલમાં જ કહ્યું હતું કે યુઝર ફીના કારણે સામાન્ય મુસાફરોને મુશ્કેલી નહીં પડે. યુઝર ફી સંબંધિત સૂચના આવતા મહિને જારી કરી શકાય છે. નવી દિલ્હી રેલવે સ્ટેશન અને મુંબઇના છત્રપતિ શિવાજી ટર્મિનસના પુનર્વિકાસ માટે ખાનગી કંપનીઓની બોલી સ્વીકારવાની અંતિમ તારીખ તરીકે રેલવેએ 6 નવેમ્બરની તારીખ નક્કી કરી છે. યુઝર ફી ઘણી કંપનીઓ માટે રેવન્યૂની ગેરંટી હશે.
આર્થિક સંકટમાંથી પસાર થઈ રહેલી રેલવે પીપીપી મોડ પર 50 સ્ટેશનોના રિડેવલપ માટે નાણાં એકત્ર કરવા મુસાફરો પર યુઝર ફી લાદવાની યોજના બનાવી રહી છે. પ્રસ્તાવ મુજબ ટ્રેનમાંથી ઉતરતા મુસાફરો પાસેથી યુઝર ફીના 50 ટકા જેટલી રકમ એકઠી કરવામાં આવશે. એ જ રીતે પ્લેટફોર્મ ટિકિટ ખરીદનારાઓ પાસેથી 10 રૂપિયા વિઝિટર ફી પણ લેવામાં આવશે.