TRAI / હવેથી તમારા મોબાઈલની રીંગ આટલા સૅકન્ડ્સ વાગશે, TRAIએ કર્યો આદેશ

ટેલિકોમ રેગ્યુલેટરી ઓથોરિટી (TRAI)એ હમણા જાહેર કર્યું છે કે વોઇસ કોલ આવતા મોબાઈલ ફોનમાં ઓછામાં ઓછી 30 સેકન્ડ રિંગ વાગવી જરૂરી છે. આ સમય નક્કી કરીને તેમણે રિલાયન્સ અને એરટેલ વચ્ચે ચાલી રહેલા વિવાદનું સમાધાન કર્યું હતું. 

શું હતો વિવાદ? 

એરટેલનો આરોપ હતો કે Jio જાણી જોઈને તેમનો રીંગ ટાઈમ ઓછો રાખે છે. આમ કરવાથી Jio બીજી ટેલીકોમ કંપની પાસે ઇન્ટરકનેક્શન યુસેજ ચાર્જીસ (IUC) સાથે છેડછાડ કરીને તેને વધુ પ્રમાણમાં વસૂલે છે. 

શું છે ઇન્ટરકનેક્શન યુસેજ ચાર્જીસ? 

ઇન્ટરકનેક્શન ચાર્જીસ એ એક ટેલીકોમ કંપની બીજી ટેલીકોમ કંપની પાસે વસુલે છે. ઉદાહરણ તરીકે જયારે JIoનો ગ્રાહક Jioના સીમકાર્ડ વડે વોડાફોનના કાર્ડધારક બીજા ગ્રાહકને ફોન કરે છે ત્યારે કોલ ઉપાડતાની સાથે જ Jioએ વોડાફોનને ઇન્ટરકનેક્શન યુસેજ ચાર્જીસની રકમ ચૂકવવી પડે છે. આ રકમ ટેલીકોમ કંપનીઓની આવકનો પ્રમુખ સ્ત્રોત છે. હાલ ઇન્ટરકનેક્શન યુસેજ ચાર્જીસ 6 પૈસા પ્રતિ મિનિટ છે. 

એરટેલનો આક્ષેપ હતો કે Jio તેની કોલ રીંગનો સમય ઓછો રાખે છે જેની પાછળ તેની ગણતરી એવી છે કે આમ કરવાથી મિસ કોલનું પ્રમાણ વધે છે જેથી મિસ કોલ થઇ ગયા પછી જે તે ટેલીકોમ કંપનીના ગ્રાહકે Jioના ગ્રાહકને કોલ બેક કરવો પડે છે. આ વળતો કોલ કરતા જ જે તે કંપનીએ Jioને તેમના ઇન્ટરકનેક્શન યુસેજ ચાર્જીસ ચુકવવા પડે છે. આમ ઓછી રીંગ સાથે Jio વધુ ઇન્ટરકનેક્શન યુસેજ ચાર્જીસ વસુલવા માંગે છે. જેથી આમ જોવા જઈએ તો રિંગ ટાઈમ પ્રત્યક્ષ નહીં પરંતુ પરોક્ષ રીતે સામાન્ય યુઝર માટે મહત્વનો છે. કારણકે ટૅલિકૉમ કંપનીઓ રીંગ ટાઈમને આધારે જ યુઝર્સ પાસેથી ટૉક ટાઈમનો ચાર્જ વસૂલતી હોય છે. 

ઉલ્લેખનીય છે કે એરટેલે જણાવ્યું હતું કે રિંગનો સમય 45 સેકન્ડ હોવો જોઈએ. વોડાફોન આઈડિયા 30 સેકન્ડનો સમય ઇચ્છતા હતા જયારે jio આ સમય ફક્ત 20 થી 25 સેકન્ડ રહે એમ ઇચ્છતા હતા. 

jioના મતે તેમના 94% કોલ્સ 25 સેકન્ડની અંદર ઉપડી જાય છે અને ઓછો રિંગ સમય સ્પેક્ટ્રમ સંસાધનોની બચત કરે છે.  આશ્ચર્યજનક રીતે jioમાં રિંગ સમય 25 સેકન્ડ હોવા છતાં તેનો આઉટગોઇંગ ટ્રાફિક ઇનકમિંગ ટ્રાફિક કરતા વધુ છે. જૂનના ડેટા મુજબ jioમાં કુલ વોઇસ ટ્રાફિકના 64% ટ્રાફિક આઉટગોઇંગનો છે.   

TRAIએ આ બાબત ઉપર 16 સપ્ટેમ્બરે કન્સલ્ટેશન પેપર રજુ કર્યું હતું. 

રિંગ ટાઈમ ઓછો હોવાનો ફાયદો સ્પેક્ટ્રમની બચત છે જેની સામે દલીલ એવી છે કે જો ફોન રિસીવ કરવાનો સમય ખુબ ઓછો થઇ જાય તો જે તે નેટવર્કના પર્ફોર્મન્સ પણ સવાલો ઉભા થયા છે.