સુરતના ઓલપાડ પંથકમાંથી વધુ એક વખત ગાંજાના જથ્થા સાથે એક સગીર, યુવતી સહિત ત્રણ આરોપીઓ ઝડપાયા છે. જેની પૂછપરછમાં ચોંકાવનારા ખુલાસા થયા છે.
સુરતના ઓલપાડથી ઝડપાયો ગાંજાનો વેપલો
ભુવનેશ્વરથી ટ્રેન મારફતે લવાતો હતો ગાંજો
14 કિલો ગાંજા સાથે 3 ની કરાઇ અટકાયત
ગુજરાતમાં દારૂ અને ગાંજાનો જથ્થો પકડાવાના કિસ્સાઓ હવે આમ બાબત બની ગયા હોય તેમ અવારનવાર સામે આવી રહ્યા છે. આરોપીઓને પોલીસ અને કાયદાનો ડર ન રહ્યો હોય તેમ બેફામ બનીને નશાનો કાળો કારોબાર ચલાવે છે. તેવામાં સુરત ઓલપાડના કારેલી ગામેથી14 કિલો ગાંજાનો જથ્થો ઝડપાયો હતો. જેને લઈને પોલીસની કામગીરી સામે સવાલો ઊભા થયા છે આ પ્રકરણમાં ગાંજાની હેરાફેરી માટે સગીર અને યુવતીનો ઉપયોગ કરવામાં આવતો હોવાની પણ ચોંકાવનારી હકીકત બહાર આવતાં ચકચાર મચી છે.
રૂપિયા 2.11 લાખનો મુદ્દમાલ કબજે કરાયો
ગાંજાના જથ્થા અંગેની SOG પોલીસને કાને વાત પડી હતી જે બાતમીને આધારે પોલીસ સ્ટાફે ઓલપાડના કારેલી ગામે રેડ પાડી હતી આ દરમિયાન ઓરિસ્સાની યુવતી, એક શખ્સ અને એક સગીર ગાંજાના જથ્થા સાથે પોલીસ ઝપટે ચડયા હતા. જેની પૂછપરછ અને તપાસ બાદ SOGએ 14 કિલો ગાંજાનો જથ્થો જપ્ત કર્યો હતો. વધુમાં પોલીસ તપાસ દરમિયાન આરોપીઓ પાસેથી મોબાઈલ, રોકડ સહિત 2.11 લાખનો મુદ્દામાલ મળી આવતાં પોલીસે તમામ મુદામાલ કબ્જે કરી 3 આરોપીની અટકાયત કરી હતી.
ગાંજાની હેરાફેરી માટે સગીર અને યુવતીનો કરાતો હતો ઉપયોગ
પોલીસ ઝપટે ચડેલા આરોપીઓની પૂછપરછમાં યુવતી, સગીર સહિત ત્રણેય ભુવનેશ્વરથી ટ્રેન મારફતે સુરત ખાતે ગાંજો લાવ્યા હતા. વધુમાં ગાંજાના જથ્થાની હેરાફેરીમાં યુવતી અને સગીરનો ઉપયોગ કરાતો હોવાની ચોંકાવનારી હકીકત બહાર આવ્યા બાદ પૂછપરછમાં આરોપી સગીર અને યુવતીને 10 હજાર જેટલું કમિશન આપતો હોવાનો ઘટસ્ફોટ થયો છે. ગાંજો મંગાવનાર અને ગાંજો આપનાર આરોપીને વોન્ટેડ જાહેર કરી SOG પોલીસે વધુ કાર્યવાહી હાથ ધરી છે.