એક્ટ / ટ્રાફિકના નવા નિયમો આવકાર્ય, પરંતુ વ્યવહારુ અભિગમ જરૂરી

તેમજ તેની પાછળનો આખરી હેતુ ટ્રાફિકના નિયમોનો લોકો દ્વારા ચુસ્તપણે અમલ કરાવવાનો છે. ૧ સપ્ટેમ્બરથી અમલી બનેલ નવા મોટર વિહિકલ એકટના પગલે કેટલીક વિચિત્ર વિસંગતતાઓ પણ ઊભી થઇ છે.

તાજેતરમાં દિલ્હીમાં ટ્રાફિક નિયમોના ભંગ બદલ જે દંડ સેેંકડો રૂપિયામાં ઇશ્યૂ કરવામાં આવતા હતા તે હવે હજારો રૂપિયામાં તબદિલ થઇ ગયા છે. એમાંય ટુ વ્હીલર ચાલકોની સ્થિતિ તો એવી કફોડી બની છે કે કેટલાક કિસ્સાઓમાં તો તેમનાં વાહનોની કિંમત કરતાં દંડની રકમ વધી જાય છે.

નવી દિલ્હી નજીક ગુડગાંવમાં આવા બે કિસ્સા સામે આવ્યા હતા જેમાં સ્કૂટીચાલકોને અનુક્રમે રૂ.ર૩,૦૦૦ અને રૂ.ર૪,૦૦૦ના દંડ ફટકારવામાં આવ્યા હતા. એક ઓટો ચાલકને રૂ.૩ર,૦૦૦નો દંડ ફટકારવામાં આવ્યો હતો.

વાહનચાલકે જણાવ્યું કે તેના વાહનની કિંમત રૂ.૧પ,૦૦૦ છે તો પછી તે રૂ.ર૩,૦૦૦નો દંડ શા માટે ચૂકવે? એજ રીતે અન્ય એક વાહનચાલકને રાજીવ ચોક નજીક રૂ.ર૪,૦૦૦નો દંડ કરવામાં આવ્યો હતો. પોલીસે તેનું સ્કૂટર પણ જપ્ત કરી લીધું હતું. આ બંને યુવાન હેલ્મેટ પહેર્યા વગર જઇ રહ્યા હતા ત્યારે અટકાવ્યા હતા. 

નવા મોટર વિહિકલ એક્ટ-ર૦૧૯ને લોકસભામાં મંજૂરી મળ્યા બાદ હવે એ કાયદો બની ગયો છે. આ અંતર્ગત વાહનોનાં નિયમોમાં ભંગ બદલ વધુ કડક જોગવાઇ કરવામાં આવી છે. તે મુજબ એક્ટની સેકશન ૧૯૪-બી મુજબ ચાર વર્ષથી મોટા બાળક માટે પણ સિટબેલ્ટ ફરજિયાત થશે.

ઉપરાંત એમ્બ્યુલન્સને રસ્તો ન આપવો, વધુ સ્પીડે ગાડી ચલાવવી, ઓવરલોડ વાહન ચલાવવું, લાઈસન્સ વગર વાહન ચલાવવું, હેલ્મેટ ન પહેરવી સહિતના તમામ નિયમો ઉપર આકરા દંડની જોગવાઇ કરવામાં આવી છે.

જો કોઈ વાહન માલિકે થર્ડ પાર્ટી ઈન્સ્યોરન્સ નહીં કરાવ્યો હોય તો તેને દંડ સાથે જેલ પણ થઈ શકે છે. હવે નવા નિયમ મુજબ ઈન્સ્યોરન્સ વગર વાહન ચલાવનાર માટે દંડની રકમ બે ગણી થઈ છે. આ રકમ પહેલા ૧૦૦૦ હજાર હતી તે વધીને ૨૦૦૦ કરવામાં આવી છે.

જનરલ ઈન્સ્યોરન્સ કાઉન્સિલના આંકડા મુજબ રસ્તા પર ફરનારા અંદાજે ૬૦ ટકા વાહનો ઈન્સ્યોરન્સ વગર દોડી રહ્યા છે. જેમાંથી સૌથી વધુ સંખ્યા ટુ વ્હીલરની છે. વાહન અકસ્માતમાં ગંભીર ઈજા કે મોતના કિસ્સામાં થર્ડ પાર્ટી ઇન્સ્યોરન્સ ન હોય તેવા કિસ્સામાં વળતર મળવામાં મુશ્કેલી થતી હતી.

ટ્રાફિક ઓથોરિટીએ નવા મોટર વિહિકલ એકટનો અમલ કરાવતી વખતેે દરેક કિસ્સાના અલગ અલગ પરિબળોને ધ્યાનમાં લેવા જોઇએ. ખાસ કરીને વાહનની ઉંમર, વાહનચાલક દ્વારા ભંગ કરવામાં આવેલ ટ્રાફિકના નિયમોની સંખ્યા, વાહનચાલક ટ્રાફિકના નિયમોનો વારંવાર ભંગ કરે છે કે કેમ? વગેરે બાબતો પણ જોવી જોઇએ.

નવા મોટર વિહિકલ એકટની કડક જોગવાઇઓના અમલ વખતે ટ્રાફિક ઓથોરિટીએ નિયમોને ચુસ્ત રીતે વળગી રહેવાનું જક્કી વલણ અપનાવવાને બદલે વ્યવહારુ અભિગમ અપનાવવાની જરૂર રહેશે.

ખાસ કરીને ૧૦ વર્ષ કરતાં વધુ જૂનું વાહન હોય તો તેમાં થર્ડ પાર્ટી ઇન્સ્યોરન્સનો દુરાગ્રહ રાખવો વ્યવહારુ નથી, કારણ કે ઘણી વાર વાહનની કિંમત કરતાં ઇન્સ્યોરન્સનું પ્રિમિયમ વધી જતું હોય છે. વાહનચાલકોની લાગણી અને માગણી છે કે આ બાબતે ઓથોરિટી દરેક કિસ્સાને અલગ રીતે મુલવીને વ્યવહારુ અભિગમ દાખવે.