તમારા કામનું / તમારા બાળકને બાઇક-કારની ચાવી આપતા પહેલા 10 વાર વિચારજો, થઈ શકે છે હજ્જારોનો દંડ અને જેલ

• 18 વર્ષથી ઓછી ઉંમરના બાળકો વાહન ચલાવી ન શકે
• બાળકો વાહન ચાલવતા પકડાઈ તો દંડ માતા-પિતા પર લાગી શકે
• માતા-પિતાને 25000રૂ. નો દંડ અને 3 વર્ષ સુધીની જેલ થઇ શકે છે

કોઇપણ દેશમાં વાહન ચલાવવા માટે થોડા નિયમો હોય છે, જે લોકો વાહન ચલાવે છે તેને આ નિયમોની જાણકારી હોવી જોઈએ. જો આ નિયમ ભંગ કરવામાં આવે તો તેના માટે દંડની પણ જોગવાઈઓ કરવામાં આવી હોય છે. ભારતમાં ટ્રાફિક માટે પણ ઘણા કડક નિયમો છે. ભારતમાં વાહન ચલાવવાની ઓછામાં ઓછી ઉંમર 18 વર્ષ છે. 18 વર્ષથી ઓછી ઉંમરના બાળકો માટે વાહન ચલાવવું ગેરકાયદેસર છે. પરંતુ ઘણીવાર જોવામાં આવે છે કે 18 વર્ષથી નાની ઉંમરના બાળકો પણ આજકાલ રસ્તાઓ પર વાહન ચલાવે છે. માતા-પિતા પણ બાળકોને આ કરવાની છૂટ આપે છે, પરંતુ તેના લીધે તેઓ બાળકોના જીવ જોખમમાં મૂકે છે. જો તમે 18 વર્ષથી ઓછી ઉંમરના તમારા બાળકોને પણ વાહન ચલાવવાની મંજૂરી આપો છો, તો તમને ભારે દંડ સાથે જેલની સજા પણ થઈ શકે છે.

બાળકોને વાહન ન આપો
જો તમારું બાળક 18 વર્ષથી ઓછી ઉંમરનું છે અને તે બાઇક અથવા કારની ચાવી માંગે છે, તો તેમની માંગને ક્યારેય પૂરી કરશો નહીં. જો કોઈ બાળક દ્વારા અકસ્માત થાય છે, તો તમે વાહનના વીમા માટે ક્લેમ પણ કરી શકશો નહીં કારણ કે ડ્રાઇવિંગ કરતા સગીરોને કોઈ વીમા પોલિસી સેવાઓ લાગુ પડતી નથી. તેથી તમે તમારા વાહનના વીમાનો કોઈ લાભ મેળવી શકશો નહીં.

25,000 સુધીનો દંડ
સગીરના ડ્રાઇવિંગને લઈને ઘણા કડક નિયમો છે. જો કોઈ બાળક ડ્રાઇવિંગ કરતા પકડાય છે, તો તેના માતાપિતા સામે સીધી કાર્યવાહી થઈ શકે છે. બાળકના માતા-પિતાને 25 હજાર રૂપિયા સુધીનો દંડ અને 3 વર્ષ સુધીની જેલની સજા પણ થઈ શકે છે. જેથી માતાપિતાએ સાવચેત રહેવું જોઈએ કે તેઓ તેમના બાળકને વાહન ચલાવવા ન આપે.

અન્ય કડક નિયમો
તમને જણાવી દઈએ કે દારૂ પીને ગાડી ચલાવવા પર દસ હજાર રૂપિયાનો ભારે દંડનો નિયમ છે. આ સાથે જ ઓવરલોડિંગ પર 20 હજાર દંડની જોગવાઈ છે. જો તમે સીટ બેલ્ટ નહીં પહેરો તો તમને એક હજાર રૂપિયાનો દંડ થશે. હેલ્મેટ ન પહેરવા પર 1000નો દંડ પણ લાગશે અને ત્રણ મહિના માટે લાયસન્સ સસ્પેન્ડ કરી શકાશે.