રાહતનાં સમાચાર / ચિંતા ના કરો! PUC અને હેલ્મેટ ના હોય તો પણ પોલીસ નહીં રોકે, આ તારીખ સુધી સરકારે આપી છૂટ

• વીમા અને લાયસન્સમાં સરકાર દ્વારા કોઇ છૂટછાટ નહીં
• વાહન એજન્સી દ્વારા હેલ્મેટનો કોઈ અલગથી ચાર્જ લેવાશે તો થશે કાયદાકીય કાર્યવાહી
• 10 દિવસમાં રાજ્યમાં ખોલવામાં આવશે નવા PUC સેન્ટર

રાજ્યમાં 900 જેટલા નવા પીયૂસી સેન્ટરો શરૂ થશે

નવા મોટર વ્હીકલ એક્ટને લઇ વાહન વ્યવહારમંત્રી આર. સી ફળદુએ પત્રકાર પરિષદ યોજી મહત્વની જાહેરાત કરતા જણાવ્યું કે, 'હેલ્મેટ માટે 15 ઓક્ટોબર સુધીની છૂટ આપવામાં આવે છે. 15 ઓક્ટોબર સુધીમાં હેલ્મેટ ખરીદી લેવાનો નિર્દેશ આપવામાં આવ્યો છે. હેલ્મેટનાં કાયદામાં 30 દિવસની છૂટછાટ આપવામાં આવી છે. PUC કઢાવવા માટે પણ વધારાનાં 15 દિવસની છૂટછાટ આપવામાં આવી છે. રાજ્યમાં તમામ જો કે હવેથી ટુ-વ્હીલર વિક્રેતાઓએ નવા ગ્રાહકને ફરજિયાત હેલ્મેટ આપવા પડશે. ટુ-વ્હીલરની ખરીદી પર ફ્રીમાં ISI માર્કાવાળા હેલ્મેટ આપવાનો આદેશ આપવામાં આવ્યો છે.

વાહન પર હેલ્મેટનો ચાર્જ લગાવાશે તો કડક કાર્યવાહી કરાશે. જો અધિકારીઓ નિયમ તોડશે તો પણ કાર્યવાહી હાથ ધરાશે. 10 દિવસમાં રાજ્યમાં નવા PUC સેન્ટરો પણ ખોલવામાં આવશે. રાજ્યમાં 900 જેટલા નવા PUC સેન્ટર ખોલાશે. 

CM વિજય રૂપાણીની ગાડીને લઇ કર્યો મોટો ખુલાસો

બીજી બાજુ મુખ્યમંત્રીની ગાડીને લઇને પણ આર. સી ફળદુ (R. C. Faldu) એ પત્રકાર પરિષદ યોજીને ખુલાસો કરતા જણાવ્યું કે, 'સોશિયલ મીડિયામાં જે મેસેજો ફરતા થયાં છે તેને ગુજરાતનાં સુપ્રસિદ્ધ સમાચાર માધ્યમો અને મીડિયાનાં માધ્યમથી ગુજરાતનાં પ્રજાજનોને સાચી વિગતથી અવગત કરાવવા માટે હું રજૂઆત કરું છું કે સોશિયલ મીડિયામાં મુખ્યમંત્રીને ઉદ્દેશીને જે પ્રકારે નકારાત્મક અફવા સ્વરૂપે જે માહિતીઓ પ્રસ્તુત કરવામાં આવી છે તે તદ્દન સત્યથી વેગળી છે. માનનીય મુખ્યમંત્રી માટે રાજ્ય સરકાર જે વાહનોનો ઉપયોગ કરે છે તે વાહનોનાં નંબર સાથે મારે કેટલીક વિગત આપવી છે.

મુખ્યમંત્રી માટે રાજ્ય સરકાર બે વાહનો કે જેનાં નંબર છે GJ 18 G 9085 અને GJ 18 G 9086. આ બંને વાહનો DGP અને IGP પોલીસ ભવન ગાંધીનગરનાં નામે 11/04/2014થી RTO કચેરી ગાંધીનગર ખાતે રજિસ્ટ્રેશન થયેલા છે અને તેની રજિસ્ટ્રેશન સમય મર્યાદા 15 વર્ષની છે. એટલે એમની વેલિડીટી બાબતે તો કોઇ પ્રશ્ન જ નથી. આગામી તારીખ 10/04/2029 સુધીની આ બંને વાહનોની વેલિડીટી છે અને એ જ રીતે વીમા વિનાની ગાડી માનનીય મુખ્યમંત્રી શ્રી ઉપયોગ કરી રહ્યાં છે.

આ પ્રકારનો પણ એક દુષ્પ્રચાર કરવામાં આવ્યો હતો. એ બાબતે બંને વાહનો નેશનલ ઇન્શ્યોરન્સ કંપની મારફતે તારીખ 27/12/2018થી વીમાનું પ્રિમીયમ નક્કી કરવામાં આવેલું છે અને તેની મુદ્દત 31/12/2019 સુધીની છે. PUC બાબતે પણ રાજ્ય સરકારે મુખ્યમંત્રીની સુરક્ષામાં જે કાફલો જોડાયો છે તે તમામ વાહનોનાં PUCની મુદ્દત 30/09/2019 સુધીની છે.