જો તમારે ડ્રાઈવિંગ લાઇસન્સ કઢાવવાનું બાકી હશે તો તમે થાકી જશો તો પણ આરટીઓમાં લાઈસન્સ મેળવવા માટેની એપોઈન્ટમેન્ટ મળવા માટે રાહ જોવી પડશે. કેમકે દુકાળમાં અધિક માસ જેવી પરિસ્થિતિ અત્યારે આરટીઓમાં પ્રવર્તી રહી છે.
લર્નિંગ લાઇસન્સ એપ્લાય કરવા માટે રોજ રાત્રે એક વાગ્યે એપોઈન્ટમેન્ટના સ્લોટ ખૂલે છે
અમદાવાદ આરટીઓમાં નાના-મોટા અંદાજે 200 જેટલા એજન્ટો સક્રિય
સર્વરનાં ધાંધિયાંને કારણે લોકો ઓનલાઈન પેમેન્ટ કરવામાં મુશ્કેલી
દરરોજ રાત્રે એક વાગ્યે એપોઇન્ટમેન્ટના સ્લોટ ખૂલતાંની સાથે જ મિનિટોમાં એજન્ટો તમામ સ્લોટ બુક કરી દેતા હોવાના કારણે સામાન્ય નાગરિકો મુશ્કેલીમાં મુકાયા છે. તેથી જો તમારે જાતે લાઇસન્સ મેળવવા માટેની ઓન લાઈન એપોન્ટમેન્ટ લેવી હશે તો રાત્રે એક વાગે જાગી જવું પડશે.
એજન્ટો દ્વારા લોકોને એપોઈન્ટમેન્ટ લેવામાં સફળતા નથી મળતી
16મી સપ્ટેમ્બરથી સુધારેલા મોટર વિહિકલ એક્ટના ફેરફાર સાથે રાજ્ય સરકારે નવા નિયમો લાગુ કર્યા છે. જેને કારણે ડ્રાઇવિંગ લાઈસન્સની ઓનલાઇન એપોઇન્ટમેન્ટ લેવા માટે વાહન ચાલકો પડાપડી કરી રહ્યા છે પરંતુ એજન્ટો દ્વારા લોકોને એપોઈન્ટમેન્ટ લેવામાં સફળતા નથી મળતી. વાહન ચાલકોને 60 દિવસ સુધી હજુ પણ સામાન્ય નાગરિકોને અપોઇન્ટમેન્ટ મળી શકે તેવી કોઈ શક્યતા હાલમાં દેખાતી નથી. જેથી એપોઈન્ટમેન્ટ લેવા માટે મથી રહેલા લોકોએ ફરજિયાત એજન્ટો દ્વારા લેવામાં આવી રહેલી ઓનલાઇન આપવાની સાથે સીધી સ્પર્ધા કરવી પડી રહી છે.
ઘેર બેસીને એજન્ટો એપોઈન્ટમેન્ટ લઈ રહ્યા છે
અમદાવાદ આરટીઓમાં લર્નિંગ લાઇસન્સ એપ્લાય કરવા માટે રોજ રાત્રે એક વાગ્યે એપોઈન્ટમેન્ટના સ્લોટ ખૂલે છે. એજન્ટો રાત્રે એક વાગ્યે પોતાના કમ્પ્યૂટર કે લેપટોપ થી બે વાગ્યા સુધીમાં તમામ સ્લોટ બુક કરાવી લે છે. અમદાવાદ આરટીઓમાં નાના-મોટા અંદાજે 200 જેટલા એજન્ટો સક્રિય હોવાનું જાણવા મળે છે. આરટીઓ કચેરીમાં આંટાફેરા કરતા એજન્ટો સામે લાલ આંખ કરવા છતાં કચેરીથી દૂર રહીને પણ એજન્ટો પોતાનું કામ કરાવી લેતા હોવાની ફરિયાદો ઊઠી છે. ઘેર બેસીને એજન્ટો એપોઈન્ટમેન્ટ લઈ રહ્યા હોવાનું જાણવાં મળે છે.
ગણતરીની મિનિટોમાં સાઈઠમા દિવસના પણ તમામ સ્લોટ ફૂલ
ગણતરીની મિનિટોમાં સાઈઠમા દિવસના પણ તમામ સ્લોટ ફૂલ કરી દે છે. જેને લીધે સામાન્ય લોકો મુશ્કેલીઓનો સામનો કરી રહ્યા છે. આરટીઓ સાથે સંકળાયેલી તમામ કામગીરી જેવી કે લર્નિંગ લાઇસન્સ અને અન્ય કામ માટેની ફી ઓનલાઈન ભરવા લોકોને મુશ્કેલી પડી રહી છે. સર્વરનાં ધાંધિયાંને કારણે લોકો ઓનલાઈન પેમેન્ટ કરવામાં મુશ્કેલી ભોગવી રહ્યા છે. આ અંગે એ આરટીઓ એસએમઓજનીદારે જણાવ્યું હતું કે સર્વર સબંધિત પ્રશ્નો સ્થાનિક કક્ષાએ નથી અને એપોઇન્ટમેન્ટ પણ ઓનલાઇન પ્રક્રિયા હોવાના કારણે કોઈપણ વ્યક્તિ જરૂર મુજબ ઓનલાઇન એપોઈન્ટમેન્ટ બુક કરાવી શકે છે.