ટ્રાફિક દંડ / અમદાવાદીઓ સુધર્યા કે ડર્યા ? 15 દિવસમાં ટ્રાફિક નિયમોના ભંગ કરનારાઓના આંકડામાં ચોંકાવનારો ઘટાડો

અમદાવાદીઓ માટે એવું કહેવાય છે કે જ્યાં સુધી તેમના ખિસ્સાને ફટકો ન પડે ત્યાં સુધી તેઓ કોઈ પણ બાબત ગંભીરતાથી લેતાં નથી. આ વિધાનની સાબિતી આપતા એક અહેવાલ પ્રમાણે રાજ્યમાં હાલમાં જ લાગુ થયેલા નવા મોટર વ્હીકલ એક્ટ 2019ના નવા ટ્રાફિક દંડની અસર સ્વરૂપે શહેરમાં સપ્ટેમ્બર મહિનાના પહેલા ભાગના 15 દિવસમાં નોંધાયેલા ટ્રાફિકના ગુનાઓ કરતા સપ્ટેમ્બરના બીજા ભાગના 15 દિવસમાં નોંધાયેલા ટ્રાફિક ગુનાઓ કરતા સંખ્યામાં 70%નો જંગી ઘટાડો નોંધાયો છે. બીજા શબ્દોમાં કહીએ તો ટ્રાફિકનો દંડ વધતા લોકોએ ટ્રાફિકના નિયમો પાળવાનું શરુ કરી દીધું છે એવું કહી શકાય.

ટ્રાફિકના ગુનાઓમાં થયેલા ઘટાડાના આંકડા

શહેરમાં 1 સપ્ટેમ્બરથી 15 સપ્ટેમ્બર વચ્ચે ટ્રાફિકના નિયમો તોડવાના 75897 ગુના નોંધાયા હતા. આ આંકડો 16 સપ્ટેબરથી 30 સપ્ટેમ્બરમાં ઘટીને 23583 થઇ ગયો હતો. 

ગુનાઓની સંખ્યા ઘટી પણ વધેલા દંડના પગલે ઉઘરાવાયેલ દંડની રકમ વધી

અહીં ઉલ્લેખનીય છે કે ગુનાની સંખ્યા ઘટી હતી આમ છતાં દંડની વધી ગયેલી રકમના કારણે 1 સપ્ટેમ્બરથી 15 સપ્ટેમ્બર વચ્ચે 75897 ગુનાઓ માં 81.17 લાખનો દંડ ઉઘરાવાયો હતો જયારે 16 સપ્ટેમ્બરથી 30 સપ્ટેમ્બર વચ્ચે 23583 ગુનાઓમાં 95.75 લાખનો દંડ ઉઘરાવાયો હતો. આમ ઉઘરાવાયેલ દંડની રકમમાં 17%નો ઉછાળો નોંધાયો હતો. 

હેલ્મેટનો વપરાશ વધ્યો

અહી નોંધનીય છે કે 1 સપ્ટેમ્બર થી 15 સપ્ટેમ્બર વચ્ચે હેલ્મેટ વગર વાહન ચલાવતા 31224 ગુના નોંધાયા હતા જેમની સામે 31.22 લાખ રૂપિયા જેટલો દંડ વસુલાયો હતો જે 16 સપ્ટેમ્બર થી 30 સપ્ટેમ્બર વચ્ચે ઘટીને 2778 ગુના નોંધાયા હતા જેમની સામે 10.80 લાખ રૂપિયા જેટલો દંડ વસુલાયો હતો. 

શું છે ઓછા ગુનાઓ નોંધાયા પાછળનું કારણ?

ટ્રાફિકના ભંગના ગુનાઓની સંખ્યા ઘટવા માટે લોકોનું શિસ્ત વધ્યું હોવા ઉપરાંત એક કારણ એ પણ માનવામાં આવે છે કે શહેરમાં ઘણા બધા ટ્રાફિક પોલીસ નવરાત્રી અને VVIP લોકોના બંદોબસ્તમાં વ્યસ્ત હતા. 

શહેરના એક ટ્રાફિક અધિકારીએ આ બાબતે જણાવ્યું હતું કે ટ્રાફિક ભંગના ગુના ઘટવાનો ટ્રેન્ડ આખા દેશમાં જોવા મળી રહ્યો છે. મોટર વ્હીકલ એક્ટના ફેરફારના સમાચારો જાણી જાણીને લોકોમાં ટ્રાફિક નિયમો વિષે ઘણી જાગૃતિ આવી છે. 

ઉલ્લેખનીય છે કે જે ગુનાઓ માટે દંડ 100 રૂપિયા હતો એવા ગુનાઓનો દંડ વધીને 500 અને 1000 રૂપિયા થઇ ગયો છે. આ પરિસ્થિતિમાં ગુનાનોની સંખ્યા વધી છે પણ ઉઘરાવાયેલ દંડની રકમ વધી છે.